Shillong, Naiwieng 19
U Myntri Rangbah ka Jylla u Conrad K. Sangma ha ka sngi Palei u la ong ba ka Sorkar ka ïeng bad ki nonghikai deficit kiba ïakhih hapoh ka lama jong ka KJDSTA, hynrei kano-kano ka rai halor ki jingdawa jong ki ka dei ban pynïadei ïa ka jingktah ha ka liang ka pisa tyngka bad ka jingktah jong ka ïa kiwei pat ki nongtrei.
“Ngi ïatreilang bad ngi kwah ban pynbeit, ngi kwah ban wad ïa ka lad ka lynti ban ïaid shakhmat”, la ong u Conrad.
“Ngi burom ïa ki jingsngewkhia jong ki nonghikai, nga don ryngkat bad ki nonghikai, nga sngewthuh ïa ki jingeh jong ki,” u la bynrap.
U la ong ba ka Sorkar ka don ka rikod jong ka jingïakynduh bad ki nonghikai bad ban shim ruh ïa ki rai kiba eh.
“Kane ka Sorkar ka la long kawei na ki khyndiat tylli ki Sorkar kiba la ïatreilang bad baroh ki nonghikai ha baroh ki kyrdan”, u la ong. “Ki nonghikai adhoc ngi la wanrah ïa ki hapoh ka SPF, kaba dei biang ka rai kaba eh bha hynrei ka pynbeit ïa kiei-kiei na ka bynta jong ngi.”
U Conrad u la pynshai ba ki skul deficit ki dei ki skul shimet ba la pynïaid da ki mission, ki Balang ne ki shnong, ha kaba ïa ki nonghikai la thung da ka Managing Committee hynrei la siew da ka Sorkar.
“Ki dei ki nonghikai skul shimet hynrei ïa ka tulop jong ki la siew da ka Sorkar Jylla. Kumta kim dei shisha, ne long pura kum ki nonghikai Sorkar,” u la ong.
Ha ki kolej deficit, don ki nonghikai kiba kamai T.4.5 lak shibnai – kham palat ban ïa u Lat – katba ha kajuh ka jaka pule, ki nonghikai bym dei deficit kiba hikai ïa kajuh ka sobjek ki kamai tang 5,000 haduh 20,000 tyngka, u la ong.
“Ki don kumba 10 ngut na ki kiba ïoh tulop palat ïa ka 4 lak tyngka, kata ka long kumba 50 lak tyngka shisnem”, u la ong.
“Kane ka la jia namar ka rukom treikam kaba la thaw. Kam dei ka jingbakla jongno-jongno ruh”, u la ong.
U Conrad u la ong ba ka Sorkar kam lah ban thaw khlem kut por ïa ki deficit post ba thymmai haba ka hap ruh ban kyrshan ïa ki skul LP bad kiwei-kiwei ki jaka pule.
“Ngim lah ban thaw shuh ïa ki post namar ngi dang don ki jingeh, ngi hap ban ïarap ïa la ki jong ki skul Sorkar hapoh Jylla,” u la ong.
U la maham ba ka rai na ka bynta kawei ka kynhun ka pynmih ïa ki jingdawa na kiwei pat.
“Shisien ba ngi la sdang ban shim ïa ki rai kiba ïadei bad kawei ka kyrdan, ka don ka jingktah kaba jur bha ïa kiwei pat ki kyrdan,” u la ong. “Ka don ka jingktah kaba jur bha ïa kiwei pat ki nongtrei bad kiwei-kiwei ki kynhun nongtrei ne ki kynhun kiba ka Sorkar ka kyrshan, kum ki PSU.”
“Man la ka rai ka la ïoh ïa ka jingktah kaba pynbun bad ka plie lad ïa shibun ki bynta jong ki jingeh na ka bynta jong ngi bad kaba shai, ka don ka jingktah kaba khraw ha ka liang ka pisa tyngka,” u la ong.