Khlem ïadei ka kular por ilekshon, sniew ka surok Langdongdai sha Malangkona: AMLA

Nongstoiñ, Naiwieng 19 Hadien ka jingud jingnam jong ki paidbah nongleit nongwan ha ki khyndiat sngi ba la lah, ka All Meghalaya Labour Association (AMLA) Mawshynrut Circle kala leit ban jurip ïa ka surok na...

Nongstoiñ, Naiwieng 19

Hadien ka jingud jingnam jong ki paidbah nongleit nongwan ha ki khyndiat sngi ba la lah, ka All Meghalaya Labour Association (AMLA) Mawshynrut Circle kala leit ban jurip ïa ka surok na Langdongdai sha Malangkona, ha kaba kala pynpaw ba kala lap ïa ka jingsniew jong katei ka surok.

U President ka AMLA Bah Banlang Sohphoh u la ong, ha ka jingleit jurip, ki nongïalam bad dkhot ka AMLA kila lap da la ki jong ki khmat ïa ka jingsniew jong ka surok kaba don ha katei ka thaiñ kaba hap ruh hapoh ka Rambrai Jyrngam Konstitwensi bad ruh jong ka Nonglang Sirdarship.

U Bah Banlang Sohphoh u la pynpaw ïa ka jingsngew lyngngoh ban ïohi ba ki nongmihkhmat ka thaiñ kim shym la shimkhia ban peit lem ïa ka jingeh jong ki paidbah kumba kila kular ha ki por ilekshon.

U la ong ruh ba ka jingsniew jong ka surok kala wanrah ka jingeh bad jingjynjar ïa ki paidbah katei ka thaiñ khamtam ha ka pang ka shitom bad ha ka kit ka bah.

Halor kane ka surok, u Bah Banlang u la ong, ka seng ka dawa na ka tnad PWD bad kumjuh na ki MLA, MDC bad ki Myntri Sorkar ba peit ïa ka tnad PWD ba kin shimkhia ban pynbha noh ïa katei ka surok khnang ban pynsuk ïa ki paidbah nongshong shnong jong ka thaiñ.