Pynbna u Conrad ïa ka Sixth Pay Commission, aipor 8 bnai ban pyndep

Shillong, Naiwieng 19 Ha ka jingpynbna kaba khraw na ka bynta ki nongtrei Sorkar, ka Kynhun Myntri ha ka sngi Palei kala pynmih ïa ka jingpynbna halor ka jingthaw ïa ka Sixth Meghalaya Pay Commission....

Shillong, Naiwieng 19

Ha ka jingpynbna kaba khraw na ka bynta ki nongtrei Sorkar, ka Kynhun Myntri ha ka sngi Palei kala pynmih ïa ka jingpynbna halor ka jingthaw ïa ka Sixth Meghalaya Pay Commission.

U Myntri Rangbah Conrad K. Sangma u la ïathuh ba ïa kane ka Commission yn khlieh da u Chief Secretary barim ka Jylla Bah D.P Wahlang, lem bad ki heh ophisar ba la shongthait ba kynthup ïa u Bah T.Lyngwa bad Ambrose Marak kum ki dkhot.

La aipor phra bnai ïa ka Commission ba kan pyndep ïa ka kam bala bynshet ha ka.

“Nga sngewkmen ban pynbna, khamtam na ka bynta ki nongtrei ka Sorkar Jylla, ba mynta ka sngi ngi la mynjur, bad thaw ïa ka Sixth Meghalaya Pay Commission,” ong u Conrad haba kren sha ki lad pathai khubor hadien ka jingïalang ka kynhun Myntri.

U la ïathuh ba ka jingpynbna (notification) ka don ïa ki kyndon treikam jong ka Commission, hynrei baroh ki jingsngewkhia ki nongtrei yn sa phah sha ka Commission.

“Ai ba ngan kular ïa baroh ba ïa baroh ki jingsngewkhia ba ki don, yn sa phah sha ka Pay Commission bad ki ruh kumjuh ki long laitluid ban leit ïakynduh ïa ka Pay Commission” u la ong.

U Conrad u ïathuh ba ka Sorkar kala plie ïa ka lynti ban bynrap shuh shuh ïa ki kyndon treikam ka Commission kham hadien, khnang ban nym ieh ïa kano-kano ka jingsngewkhia.

U pynkynmaw ba ïa ka jingdawa la pynsngew ha ka Dorbar Paidbah ba long ha State Guest House mynta la arbnai eiei.

“Halor ki jingïakren ha katei ka jingïalang, nga la khot mardor ïa ka jingïalang bad kila sdang ïa ka kam ban khmih bniah ïa ki briew na ka bynta ka kam Chairman,” ong u Conrad.