Shillong, Naiwieng 19
Ka Join Coordination Committee (JCC) kaba kynthup ïa ka Federation of Khasi Jaiñtia and Garo People (FKJGP), Hynñiewtrep National Youth Front (HNYF), Ri-Bhoi Youth Federation (RBYF), Jaiñtia Students Union (JSU), Garo Students Union (GSU), A-Chik Youth Welfare Organization (AYWO), Association for Democracy and Empowerment (ADE), Federation for A-Chik Freedom (FAF), All A-Chik Youth Welfare Society (AAYWS) bad A-Chik Holistic Awakening Movement (AHAM) ka pynrem jur ïa ka jingkren jong u Bah Prestone Tynsong uba dei ruh u Symbud Myntri Rangbah ka Sorkar Jylla pyrshah ïa ki nonghikai kiba pynlong ïa ka jingïakhih hapoh jong ka shatri Khasi-Jaiñtia Deficit School Teachers’ Association (KJDSTA) da kaba kynnoh ba ki dei ki ‘kruiñ bad ki sohpyut’.
Ha ka kyrwoh khubor ba la pyllait da u Vice President ka FKJGP Sengkmie samla Kitboklang Nongphlang u la ong, ka jingkren laplah jong u Bah Prestone Tynsong ym tang ba kala pynhiar kyrdan ïa ka saiñ pyrkhat bad ïa ka kyrdan jong u hi kat u Symbud Myntri Rangbah jong ka Sorkar Jylla hynrei kala ktah ïa ka burom bad ka ijot jong baroh ki nonghikai kiba ai ïa ka jingshakri bad kiba don ha ki jylli bapher-bapher naduh ki skul, ki college & university ruh kumjuh.
U la ong, ym tang katta, katei ka jingkren jong u Bah Prestone kala pynmong ym tang ïa ki nonghikai hynrei wat ïa ki kmie ki kpa jong ki khynnah skul bad samla pule ha ka Jylla kaba la ktah matïong hi ruh ïa ki paid nongshong shnong jong ka Jylla kiba la sakhi ïa u synñiang u bynhei jong ki nonghikai kaba ki la noh sha ka imlang ka sahlang bad sha ka jaidbynriew jong ka Jylla hi baroh kawei.
Na ka liang jong ka Join Coordination Committee (FKJGP, HNYF, RBYF, JSU, GSU, AYWO, ADE, FAF, AAYWS & AHAM) ka dawa mardor na u Bah Prestone Tynsong, ba u dei ban panmap mardor na ki nonghikai bad hakhmat jong ki paidbah jong ka Jylla hi baroh kawei ïa katei ka jingkren laplah da ki kyntien phlan duman pyrshah ïa ki nonghikai kiba la long kiwei na ki paia khnong ban kyntiew ïa ka jingnang jingstad, ïa kaba kum ki paidbah wat ha kylleng ki ri jong ka pyrthei ruh kila ju ñiew burom ba ka kam nonghikai ka dei ka kam kaba donburom tam hakhmat jong ka pyrthei bad lada u Bah Prestone um nud ban panmap ka pawshai ba u dei hi ma u uta u ‘kruiñ bad u sohpyut’ hakhmat jong ka jylla hi baroh kawei, pynkut ka kyrwoh na u samla Kitboklang Nongphlang.