Ka Sorkar ka bakla ban phah kynriah ïa ki bos ban ai pat ïa ka jaka sha kiba shong die madan: Draibar Sumo

Shillong, Naiwieng 20 Ki katto katne ki nongñiah kali kamai kiba ju pynïeng kali ha ka jaka pynïeng kali ba don ha pyrshah Anjalee ki la pynpaw ka jingbym ïahap halor ka jingthmu ka Sorkar...

Shillong, Naiwieng 20

Ki katto katne ki nongñiah kali kamai kiba ju pynïeng kali ha ka jaka pynïeng kali ba don ha pyrshah Anjalee ki la pynpaw ka jingbym ïahap halor ka jingthmu ka Sorkar ban pynkynriah ïa ki bos ïew kiba ju ïeng ha Mawlong Hat bad ban ai jaka ïa ki nongshong die madan.

Haba ïoh ban ïakren ïa u Bah Fernandis Jyrwa u ba dei u nongñiah Sumo na Shillong sha ki thaiñ Pynursla, u la ong ba kane ka jingthmu jong ka Sorkar ban pynkynriah ïa ki bos na Mawlong Hat sha ka jaka ba ha pyrshah Anjalee ka long kaba bakla shibun eh bad kyntu ïa ka Sorkar ban pyrkhat bha da kumwei.

“Ngam sngew ïahap ba ka Sorkar kan shu pynkynriah ïa ki bos ïew ba ju ïeng ha Mawlong Hat kiba la don palat 50 snem ha katei ka jaka, shu buh lada wan sa ki bos hangne kan ktah ïa ngi ruh bad kan sa don ka jingkhapngiah namar ym dap jaka shuh” u la ong.

Shuh-shuh u la ong ba ïa ki jaka pynïeng kali (Parking), ka tnad Urban ka shna na ka bynta ki kali ba kin ïoh jaka ban ïeng, ym dei ba la shna na ka bynta ki briew ba shong die madan kiba dang shu mih dang mynno. “Ka Sorkar ka dei ban peit lang ïa kiba la don la slem ha kane ka jaka, ka Sorkar ka dei ban pyrkhat bha ïa kane namar kiba shong die madan ki wan hadien jong ki Parking” u la ong.

Haba kynthoh ïa ka Sorkar u Bah Fernandis u la ong, “Ka jingleh kane ka Sorkar ka dei ka jingïuhroit ïa kiba rit ba kam ailad shuh ïa kiba dang ïakhun ban kiew ba kin kiew ha ka ïoh ka kot bad haba ïadei baroh ki liang” u la bynrap ba lada kynriah ïa ki bos kan ktah jur bha ïa ki paidbah ha ka kit ka bah ïa ki mar ki mata.