Shillong, Naiwieng 20
Ka Hynñiewtrep Youths’ Council (HYC), ka la pynrem jur ïa ka jingkren u Myntri Rangbah ka Jylla, ba ki don katto katne ki nonghikai deficit college jong ka Jylla kiba ïoh tulop haduh T.4.5 lak shibnai.
Ha ka kyrwoh ba la phah da u Bah Roykupar Synrem, President u la ong ba ka jingkren kaba kum kane na u nongïalam ba hakhlieh duh ka Sorkar, ka dei ban don ha ryngkat ka jingpynshisha da ki kot ki sla kiba shai, ym tang da ki kyntien kynnoh kynthoh ïa ki nonghikai ha ryngkat ka jingmut ban ñion beiñ ïa ki.
Katkum ka 7th UGC Pay Structure, ka tulop kaba sdang (basic pay) ka long naduh T.57,700 na ka bynta u Assistant Professor, haduh T.1,44,200 na ka bynta u Professor bad T.1,82,200 na ka bynta u Senior Professor. Wat ha ka pay-matrix kaba heh tam hapoh ka Academic Level 15, ka long tang T.2,24,100. Haba kynthup lang ïa ki jingïoh baroh, ka tulop kaba ïoh (gross salary) ka lah ban kiew, hynrei ka jingkren u Myntri Rangbah ba ïoh haduh 4.5 lak ka donkam ban pynshai da ka jingpynshisha kaba shai bad kaba thikna.
U Bah Roykupar u la ong ba ka HYC ka dawa ïa u Myntri Rangbah ba un pyntip bad pyni tang kawei ka kot siew tulop kaba thikna jong u nonghikai deficit kolej uba ïoh T.4.5 lak shibnai.
“U dei ban batai shai ïa ka kyrdan (designation), ka Academic Level bad ki bynta jong ka tulop. Lada um lah ban pynbiang ïa ka jingpynshisha, u dei ban weng ïa ka jingkren laplah ka jong u bad panmap paidbah na ki nonghikai,” u la ong.
“Ka HYC ka kwah ruh ban kdew ba u Myntri Rangbah u dei ban pynshai paidbah shaphang ka jinglut jong ka pisa paidbah na ka bynta ki Chairperson, Co-Chairperson bad ki Adviser jong ka Sorkar. U dei ruh ban pynpaw ïa ka jinglut baroh kaba kynthup ïa ki tulop, allowance, kali, ki nongtrei (staff) bad kiwei ki jingmyntoi jong ki. Balei la shu kynnoh, kynthoh bad pynpaw paidbah ïa ki jingïoh ki nonghikai, katba ka tulop, ki allowance bad ki jingmyntoi jong ki political appointee la shu da rap-jot bad set na ki paidbah,” ong u Bah Roykupar.
Ka HYC ka pynpaw ba kam lah ban shu sngap ban ïohi ba ki nonghikai, kin shah kynthoh bad kynnoh khlem nongrim.