Khot ïamir-jingmut ka Sorkar ïa ki nonghikai ‘Deficit’ ha ka 30 tarik Naiwieng

Shillong, Naiwieng 20 Ka Directorate of School Education and Literacy (DSEL) ka la khot ïa ka jingïalang ïamir jingmut bad ki nonghikai kiba shakri ha ki skul ‘Deficit’ ha ka 30 tarik u Naiwieng, khnang...

Shillong, Naiwieng 20

Ka Directorate of School Education and Literacy (DSEL) ka la khot ïa ka jingïalang ïamir jingmut bad ki nonghikai kiba shakri ha ki skul ‘Deficit’ ha ka 30 tarik u Naiwieng, khnang ban sngewthuh ïa ki jingsngewkhia jong ki bad ban wad ïa ka lad jingpynbeit haba ïadei bad ki jingdawa bad ki jingeh jong ki ha ka rukom kaba ïa mynjur lang.

Ha ka shithi ba la pyllait ha ka 20 tarik Naiwieng, ka Director ka tnad School Education and Literacy, ka Richa Kulkarni ka la pyntip sha baroh ki District School Education Officer (DS EO) bad Sub-Divisional School Education Officer (SDSEO) halor ka jingthmu jong kane ka jingïakynduh lang.

Ïa katei ka jingïalang la buh por hadien ba la pynkut ïa ki eksamin kiba dang ïaid shakhmat, ki ban bteng haduh ka 27 tarik Naiwieng, 2026, khnang ban ym wanrah kano-kano ka jingthut haba ïadei bad ka jingïaid beit ïaid ryntih jong ka eksamin. Kan long ha ka por 3 baje mynsngi ha MTTA Conference Hall, DERT Annex, Malki, Shillong.

Kumta la kyrpad ïa ki DSEO bad ki SDSEO ba kin phah 5 ngut ki nonghikai ‘Deficit’ na ki skul ‘Deficit’ bapher-bapher jong ki distrik jong ki ban wan sha katei ka jingïalang.

Shuh shuh yn ai ruh ïa ka TA bad DA sha ki nonghikai ba la jied, bad la bthah ïa ki ophisar ban phah ïa ki jingtip ba bniah jong ki nonghikai ba la jied hapoh ka 27 tarik u Naiwieng.

Ïa kane ka shithi la phah sha ki DSEO jong ka Shillong, Jowai, Khliehriat, Nongpoh, Nongstoiñ, Mawkyrwat, Tura, Williamnagar, Baghmara, Ampati bad Resubelpara, bad sha ki SDSEO jong ka Shillong, Jowai, Khliehriat, Nongpoh, Nongstoiñ, Mawkyrwat, Tura, Williamnagar, Baghmara, Ampati, Resubelpara, Sohra, Mairang, Amla  rem bad Dadenggre.