Shillong, Naiwieng 20
Ka Hynñiewtrep Youth Council (HYC) ryngkat bad ki trai kali kamai, ki la ïoh bat ïa lai ngut ki briew kiba donkti ha ka kam thok bad die kali shabar jylla.
Ha kane ka jingïoh bat, u wei ïa uba la tip kyrteng u Banrilang Jamu la suba jur ba u donkti ruh ha ka kam khaïi tuh ksiar bad ki mrad ruh kumjuh.
Kum ban shu kdew ba kiba la kynnoh shah thok shim wai kali ha u Lakhon Rymbai, na ka jingbym don ki sienjam shimkhia da ki bor pulit ha kylleng ki Police Station halor ka FIR ba ki la thep pyrshah ïa u tei u briew bad kiba ïadonktilang bad u naduh ki taïew ba la dep, ka la pynlong ïa ki ban pan jingïarap na ka HYC, ban bat ïa kitei ki briew.
Hadien ka jingïakren bad jingïapyrkhat ha katei ka janmiet, ki dkhot ka HYC ha ka jingïalam u Bah Isaac Basaiawmoit, Secretary ha ryngkat ki trai kali, ki la pyntreikam da ki buit ban riam ïa kitei ki briew bad ïoh bat ïa ki na Mawlai bad kham hadien la aiti noh sha ki pulit.
Nalor ka jingïakren halor ki kam shim wai thok ïa ki kali kamai bad die shabar jylla khlem kot khlem sla, na ka phone u Banrilang Jamu, la lap ïa ki dur Gold Biscuit bad ki durkhih jong ka ñiangbshiah Koke, kaba la mana katkum ki kyndon Wildlife ban khaïi ïa ka.
Haba pyrshang ban kylli shaphang ki dur Gold Biscuit bad dur ñiangbshiah, u Bah Banrilang Jamu u la ong ba la shu phah ïa u da u wei u briew na Assam bad u la ïathuh ba katei ka ñiangbshiah Koke, ka dei kaba shongdor haduh 70 lak tyngka bad u tei u briew u kylli pat ban khaïi ïa ka.
Haba kren sha ki lad pathai khubor u Bah Isaac u la ong ba u Bah Banrilang u la phla ba katei ka Koke ka shongdor haduh 70 lak tyngka bad ym tip ki mut die bad pynïaid ïew ïa ka nalor ki dur ksiar.