Kolkata, Naiwieng:
Katba ka erïong Akvan ka la nang jur bha, ryngkat ki dak ki shin ba ka lah ban leit sha ka thaiñ Shatei jong ka Andhra Pradesh bad shaphang Shathie jong ka Odisha, ka sorkar jylla ha ka sngi Balang ka la pynkynriah ïa palat 47,000 ngut ki briew na ki 11 tylli ki distrik.
La bthah ruh ïa ki bor synshar jong ki distrik Puri, Jagatsinghpur bad Kendrapara ban pynkhreh ïa ki jaka ri khunswet ha ka rukom thma bad ban pynkynriah ïa ki briew na ki jaka ba rit paid.
Hadien ba la ñion ïa u Panic button, ka sorkar ka la bthah ban khang lut ïa baroh ki skul bad ki Anganwadi Centre ha Ganjam, Gajapati, Puri, Jagatsinghpur, Kendrapara bad Kandhamal distrik naduh ka sngi Palei haduh ka sngi Saitjaiñ. Ka la pyndam ruh ïa ka shuti jong baroh ki nongtrei sorkar haduh ka sngi U Blei.
Katba ka tnad peit mariang jong ka India ka la ong ba ka Akvan kan hiar sha khyndew hapdeng ka Narsapur ha Andhra Pradesh bad ka Puri haduh ka sngi Thohdieng, katto katne ki tnad ki la antad ba kane ka erïong kaba jur bha ka paw ba kan leit sha ka thaiñ Shatei jong ka Odisha. Ki don ruh ki lad ba ka Akvan ka lah ban tlot katba ka nang jan sha rud duriaw namar ka jingpher ka jingshit jingkhriat hapdeng ka sla duriaw kaba shit bha bad ka sla khyndew kaba kham khriat, ryngkat bad ka jingkiew ka jingkhluit jong ka sla bad ka jingduna ka jingpynmih um. Ki thaiñ Eastern Ghats ki lah ban don ka bynta kaba kongsan ha ka jingkynthoh jong ka rukom pyntreikam.
U Myntri Rangbah ka jylla Odisha u Mohan Charan Majhi uba la bishar bniah ïa ka jingpynkhreh ha SRC Control Room ha ryngkat u Myntri ka tnad Revenue and Disaster Management u Suresh Pujari u la ïathuh ba ka sorkar ka la buh ïa ki 10 ngut ki ophisar IAS ba rangbah na ka bynta ban peitngor baroh shisngi ha ka SRC Control Room ha Bhubaneswar. Ki ophisar kin dang ïakynduh beit bad ki nonglum khajna, ki tnad bad ki bor pynïarap.