Mawkyrwat, Naiwieng 20
Watla ka St. Xavier’s College Umoid ha South West Khasi Hills District kaba dei ka jaka pule kaba dang don tang hynriew tylli ki snem, hynrei ki jingjop jong kane ka kolej ha ka liang ka pule puthi ki la tyngshaiñ ha ki samla kiba pule ha kane ka kolej kiba la wan shakhmat ha ki kyrdan bapher-bapher ha ka skulbah NEHU.
Ka jingjop jong kane ka kolej, ka sdang nyngkong eh na ka Bashimti Snaitang, kaba la ïoh ïa ka kyrdan ba 10 ha ka Political Science ha u snem 2024, bud sa ka Ribhalin Syiemlieh kaba la ïoh ïa ka kyrdan ba 7 ha ka Education ha u snem 2025.
Ha u snem 2026 ha ka batch kaba lai kane ka kolej ka la buh ïa u mawmer bakhraw lyngba ki saw ngut ki samla pule kiba la poi sha ka kyrdan top 10 ha ka skulbah NEHU.
Napdeng ki 4 ngut kiba la pyndep ïa ka jingpule u Pyndapbor Wartde u la wan ba 2 ha ka English, ka Manosha Wahlang kyrdan ba 4 ha ka English, ka Kyntimery Jyrwa kyrdan ba 4 ha ka Education bad u Khlainborlang Marwein kyrdan ba 10 ha ka History.
Kane ka jingjop kam shym la jia kynsan lane da kaba shu jia ryngkhat hynrei ka dei lyngba ka jingtrei shitom, ka jingminot jong ki samla pule bad lyngba ka jingkyrshan ba radbah jong ki nonghikai.
Na ka liang u Principal u la ai ka jingïaroh ïa baroh ki samla pule kiba la ïoh ïa ki kyrdan bapher-bapher ha ka skulbah NEHU, ïa ki nonghikai kiba la trei shitom bad ïa ka ïing ka sem jong kine ki samla pule.
Ka St. Xavier’s College kam pyntbit ïa ki samla tang ha ka pule puthi, hynrei ki lah ban ïoh ruh ïa kiwei pat ki jinghikai ban kyntiew na ka bynta ka lawei jong ki.