Ha kane ka Dorbar Mang Tyngka kaba dang ïaid mynta, ngi ïohi ïa kiba bun ki MLA, khamtam na ka liang pyrshah, kiba ïashim bynta shitrhem ha ka Dorbar la ka dei ha ka kynta buh jingkylli ne ha ka jingwanrah ïa ki mat ïatai. Ngi dei ban pynshlur ïa ki MLA ba kin nang kren kham bha shuh-shuh. Kito ki MLA ki bym pat kren wat tang shi kyntien ruh ha kane ka Dorbar, kim dei ban duh jingkyrmen, hynrei ki dei ban long kiba shlur hadien ba ki la pynkhreh bha ïalade. Ym dei ban shu khie na jingthiah bad leit beit-beit sha Ïingdorbar ban ïakren. Dei ban don bha ka jingpynkhreh khnang ba ka jingïatai kan long kaba shai bad kaba seisoh. Ki MLA ki bym pynkhreh ïalade kin sa ngat jingeh hi namar ki Myntri Sorkar, khamtam eh u Myntri Rangbah, Conrad K Sangma, ki hap ban long kiba la khreh nadong shadong ban ïa ai nia. Lada ïoh ki MLA kiba nang ban ai nia, kiba don ha ka liang synshar kin jnang bad kin ïakynduh jingeh ban jubab. Hynrei lada kim pynkhreh, ka jingïatai kan shu long lehnohei.
Ban long MLA kam mut tang ban ïasaid ban shna surok. Ka kam bakongsan jong ki MLA ka dei ban thaw aiñ. Ngi la ïohi ba u MLA ka North Shillong, u Bah Adelbert Nongrum, u la wanrah hi da ka aiñ rew lane ka Private Member’s Bill halor ka jingbhah ïa ki samla kiba leit pule. Ngi hap ban ai jingïaroh ïa une u MLA namar u la leh ïa la ka kamram. Ïa kata ka jingpdiang ne jingkyntait jong ka Ïingdorbar ïa kane ka aiñ rew ka shong ha ka jingbun paid. Ngi la sngewthuh lypa ba ïa kane ka aiñ rew ka liang synshar kan kyntait beit tangba kaei kaba kongsan ka long ba une u MLA ka VPP u la wanrah ïa kane ka aiñ kaba donkam. Lehse ha kawei ka sngi, ka liang synshar ka lah ban wanrah ïa kaba kum kane ka aiñ bad kata kan long ka jingjop na ka bynta une u MLA. Kiwei ki MLA ruh ki dei ban smat ban wanrah ïa ki aiñ rew kaba long kum ka lad ban pynsngew sha ka jylla ïa ka jingdonkam jong ki aiñ khnang ba ka synshar ka khadar kan long kaba bit ba biang.
Wat pynlehnohei ïa ka san snem kaba ki paidbah ki la pynkhamti ha phi bad pyndonkam hok ïa ka por hapoh ka Ïingdorbar. Long kiba smat ban pule khnang ba phin tip kiei ki jingjia ym tang ha ka jylla, hynrei ha kylleng sawdong. Lyngba ka jingpule, phin lap kiei kiba kiwei ki jylla ne ki ri ki la leh ban wanrah ïa ka jingkylla ka ban ai jingmyntoi ïa ki paidbah. Kan long kaba bha shibun lada shim nuksa na kiba kum kita ki jylla ne ki ri bad ban pashat jingmut sha ka liang synshar hapoh ka Ïingdorbar. Katba phi dang pule, katta phin nang sngewthuh halade ba ka jingtip kaba phi don ka long tang khyndiat. Bad lada phi pule tista, phi lah ban wanrah jingshai lem na ka bynta kiwei ki bym don lad ne kiba wan ïasyllok bad phi haba ki ïakynduh ïa ki jingeh. Donkam ïa ki nongïalam kiba shemphang, ym tang kiba stad, ban rah ïa ka jylla sha ki kyrdan ba kham shajrong.
Ha kane ka juk ba mynta, ki paidbah ki ïohi beit kino ki MLA kiba kren bad kino kiba shu leit shongkai ha Ïingdorbar. Ka jingbun jong ki nongpyndonkam ïa ki ‘Mobile Phone’ ka la nang pynjan ïa ki paidbah ban ïohi aïu ki MLA jong ki, ki leh hadien ba ki la shah jied. Ban long MLA kam dei ka kamkai bad ka long kaba khia haduh katta-katta. Nalor ba hap ban ïakynduh ïa ki paidbah na kylleng sawdong ka konstitwensi bad jylla, hap ruh ban long kiba pynkhreh ban ïa aireng bad ka sorkar ha Ïingdorbar. Ka sorkar ka tieng ïa ki MLA kiba nud ban ai nia bad kiba da tip ruh ïa kaei kaba ki kren. Kane ka sorkar ka donbok ba ka don ïa u Conrad K Sangma kum u nongïalam namar u kham don ka bor ban ïatai bad ïasaid bad ïada. Ki jingïatai ruh ki itynnad lada ïa ai nia para ba ïa don sap.
Ki MLA ba dang thymmai ki dei ban peit nuksa na ki ’riew rim kiba don ha Ïingdorbar. Ïasyllok bad ki na ka por sha ka por khnang ban ïoh jingmut kumno ban rah ïa ki mat ha ki jingïatai. Ki don ki nongïalam ba la kham rim kiba kylluid mynsiem bad kiba kloi ban ïarap ïa kiba dang kham khynnah kam pher la ki dei na ka liang synshar ne liang pyrshah. Pynduh ïa ka jingsarong bad ka jingsngew stad, bad long kiba ïar jingmut ban pdiang ïa ka jingpyni jong kiba la kham san. Kiba la kham nang ban ïatai ruh, ki dei ban nang pynjanai ïalade khnang ba kan long ka jingmyntoi ïa ki bad ïa ka jylla. Wat shu ïa sngap than kum ki dieng lymbong namar ka i long lehnohei ka jingshah jied kum kita ki nongthaw aiñ. Wat kheiñ dewthala ïa ka jingjop ba phi la ïoh ha ka ilekshon bad ka kam, kam kut tang ha ka jingjop. Ka dei tang ka jingsdang bad ka lynti ïaid ka dang jngai.
