Ha ka jinglong briew, ka jingpihuiñ ïa kiwei ka don beit. Kane ka dei ka jinglong basniew, hynrei ïa kaba ym lah pat ban pynduh. Ka daw jong ka jingbymlah ban pynduh ïa kane ka dei kata: Ka jinglong briew. Kane ka jingpihuiñ ka pynlong ïa ngi ki briew ban duna noh ha ka jingmut jingpyrkhat, ha ka jingbishar ïa kiei kiei lane ha ka jingpynshong nongrim ïa ki mat ki jura. Ka kah dum ïa ka jingproh jabieng, ka jingsngewthuh bad ka pynlehraiñ hakhmat ka pyrthei. Ka long kaba ithamula ban peit ïa ki briew kiba don ïa ka jingpihuiñ. Ki atnud haduh katta katta haduh ba kim lah ban peit slem ïa ka jinglehbha jong kiwei. Lada long bha man bha kiwei, ki duh thiah duh dem. Lada kiwei ki don ïa ka lad ban kiew arted, kim sngewbang shuh wat tang ban bam ja ne dih sha. Lada kiwei ki kham nang ban kamai (da ka lynti ka bakhuid), ki ïaleh ban woh daw woh dong da kumne bad da kumtai. Don pat kiba leh arsap arphong da kaba buhrieh ïa ka jingpihuiñ. Hynrei kat nang buhrieh, katta ka jingpihuiñ ka nang kyan bad kam slem ban paw pyrthei.
Lehse ngi dei ban pynkylla noh ïa kata ka jinglong briew. Pynkylla sha ka jingbha. Dei ban ïakmen lang lada ki ‘lok ki leh bha man bha. Dei ban ïa thap kti jam ïa kiba lah ban kiew arted hadien ba ki la hiar arsut. Dei ban ïa ai mynsiem ïa kiba leh bha leh miat khnang ba kin nang poi kham sha kliar. Ka jingsarong ka dei ruh kawei na ki daw jong ka jinghiar arsut ka akor ka burom ne ka jingïatip lem bad pyrkhat ïa kiwei. Ha kane ka juk kaba mynta, kat nangmih ki sngi katta ka jinglong sarong ka dang synshar. Tang ha ki surok syngkien ruh la lah ban ïohi ïa ka jinglong sngew sarong ym da donkam ban hap da shongkai ne kynduh markhmat. Ka jingsngew sarong ka la pynlong ïa une ka briew ba kin duh noh ïa ka jingpyrkhat lem para briew hynrei ki la sngew ba kaei kaei baroh ka la dei beit ha jong ki. Haba ïaid ha surok, wat haba ïohi ba ka wan ka kali, kan long eh ba kin kynriah bad ki sngew thik kumba ki dei ki Syiem jong ka surok ban ïaid beit khlem jingsalia. Hap kynriah hi ki kali, lada ym kynriah ym long bad tang shu kyrpad ne kren shi kyntien ruh, la i kumba kin patrong.
Ha ka jingïaleh lane ka jingïakhun, la ka dei ha kano kano ka bynta ruh, ka don beit ka jingjop bad ka don beit ka jingrem. Ngim lah ban lait na kine. Hynrei ka shong pat ha ki briew kumno ki shim ïa ka jingjop bad ka jingrem. Don kiba khyllew bad kiew skong noh hadien ka jingjop, bad kata ka jingsarong ka ïalam ïa ki sha ka jingjot thiaw. Ki ju ong ba ka jingsarong ka ïaid hashwa ka jingjot. Ki don bun bah ki nuksa ha kaba ïadei bad kane. Don pat kiba atnud sah hadien ba shah rem haduh ba kim lah shuh ban jam shakhmat ha ka jingim bad ki shu jah noh kumto nakhmat ka pyrthei wat lada ki dei ki briew kiba don shisha ïa ka sap ka phong kaba la ai ha ki da U Nongthaw U Nongbuh. Ka jingjot ka ap lypa haba la kiew palat ka jingsarong lane haba la atnud bad pihuiñ shaba palat. Lada ngi peit bha ïa ki briew kiba heh spah (da ka lynti kaba dei) bad kiba la trei shitom shisha nalade, kim ju long kiba kob sarong. Ki trei minot beit thop ha la ka kam bad ki da pyni ba ka kam ka kren kham jam ban ïa ka ktien. Hynrei kito pat kiba shu ïoh spah khlem da pynjaw ïa ka syep ka syar, ki sarong haduh katta katta bad ki im kumba kata ka spah jong ki kan neh sah.
Don pat kiba ïalade ruh kim lah ne kim nang ban leh eiei, hynrei ynda la leh da kiwei kiba tip bad kiba nud, sa sdang sa ka kren pihuiñ. Kata ruh hana ka dei ka jinglong briew. Hynrei mano ba hiar arsut bad mano ba kiew arted haba kumne? Uta ne kata kaba pihuiñ ki hiar jraiñ, bad kiba kiew arted ki dei kita kiba nang ban trei ïa ka kam da ka jingkitkhlieh, ym da ka jingshitkhlieh. Kiba nang ban trei kim pyrwa ïa ka jingpihuiñ jong kiwei. Ki tur shaphrang da ka mynsiem bashynrang ban pyndep ïa la ka kamram. Ki kyntait sharud ïa ki jingsngew diaw ba uta ne kata ki kren bishni ne ki wad daw wad dong. Ki briew kiba minot thop kim salia ïa kaei kaba kiwei ki kren namar ka dei tang ka jingkren kaba ha suiñ bad kaba dap da ka jingpihuiñ. Kam dei kaba suk ban ym sngap ïa ka jingkren kiwei. Dei tang kiba la ih shisha ha ka jingmut jingpyrkhat kiba nud ban kyntait war ïa kaei kaba ki nongwad daw nongwad dong ki kren. Ka don ruh ka jingong ba ïa u dieng uba pynmih ïa ki soh babha bad bathiang, u kham shah kawang maw. Ïa u dieng uba ai da u sohjew soh kthang, ym don kiba kham leit tur shajan. Hynrei kat nang shah kawang maw, katta nang mih bun ki soh bathiang. Ïa uba jew bad uba kthang, bun u shu pyut kai halor dieng ne ha madan. To ngin ïa kylla thiah kylla dem ban pynkylla ïa kane ka jinglong briew basniew bad ngin ïa im lang hapdeng ka suk ka saiñ bad ka bha ka miat.
