Ka United Democratic Party (UDP) ka la pynbna ba kan pynïakhun da u Bah Synshar Lyngdoh ha ka ilekshon MLA na Sohïong konstitwensi ka ban sa long shen. Ïa ka ilekshon ha Sohïong la hap ban pynsangeh shwa shipor namar ka jingkhlad noh jong u kyrtong ka UDP ba dei ruh u Myntri sorkar barim, u Bah HDR Lyngdoh. Ha kane ka ilekshon, ki don ruh ki kyrtong na ka NPP, Congress, HSPDP, All India Trinamool Congress bad ka BJP. Kiwei ki seng saiñpyrthei kim lah shuh ban weng lane buh da ki kyrtong bathymmai namar kine ki san ngut ki la dep ban thep kyrteng lut bad ïa ki kot ki sla ruh la dep ban bishar. Dei sa tang ka UDP kaba lah ban sei kyrtong namar ka jingkhlad noh jong u Bah HDR Lyngdoh. Ngi khmih lynti ba ka Election Commission of India (ECI) kan pynbna ïa ka ilekshon na ka bynta ban jied ïa u MLA ka Sohïong konstitwensi ha kine ki khyndiat sngi ban wan.
Ha ka ilekshon kaba dang shu dep, ka UDP ka la jop 11 ngut ki MLA bad ka la don ka lad ïa ka ba kan ïalam ïa ka sorkar bathymmai lada ka la ïatreilang bad baroh ki seng saiñpyrthei lait noh ka NPP bad ka BJP. Phewse, kam shym la long kumta watla ha ka por ilekshon, ka UDP ka la wan hakhmat ban kam ba lada ki paidbah ki jied ïa ka seng, ka jylla kan ïoh da u Myntri Rangbah uba na Rilum Khasi Jaiñtia. Katba ka jingkhmih lynti kam pat kut, ka UDP ka la leit rung noh sha ka kynhun MDA 2.0 ba la ïalam da u Conrad K Sangma, bad u Myntri Rangbah u la ai jaka tang na ka bynta arngut ki MLA ka UDP ban long Myntri, bad wat u Bah Metbah Lyngdoh u la duh noh ïa ka shuki Lamphang kaba u la bat ha kine ki snem kiba la leit noh.
Ka jingïakren ha Sohïong ka long ba ka jingleit pynïasoh ka UDP sha ka sorkar MDA 2.0 kan ktah kylla ïa ka ha ka ilekshon. Ngi la ïohi ba ha East Khasi Hills, ka NPP ka la jop tang arngut ki MLA, u Bah Prestone Tynsong na Pynursla bad ka Kong M Ampareen Lyngdoh na East Shillong konstitwensi. Ngi la sngewthuh tang nangne ba ki paidbah kim da sngewmon shuh ïa ka NPP ha kane ka ilekshon. Nalorkata, ka jingwan jong ka Voice of the People Party (VPP) ka la ktah jur ïa ki kyrtong ka NPP ha kiba bun ki jaka haduh ba ki MLA na kane ka seng ki la wan ha ka kyrdan ba lai. Hynrei ka NPP ka la donbok ba ka la jop haduh 18 ngut ki MLA na Rilum Garo, bad uba kham donbok eh u dei u Conrad. Ka jingjop jong haduh 18 ngut ki MLA na Rilum Garo ka la khang lad ïa kiwei pat ki nongïalam ka NPP na Rilum Khasi Jaiñtia kiba la phohsniew ban long Myntri Rangbah mynta la kham slem. Mynta ki la shu kut noh kumto bad ki la hap ban pdiang biang ïa u Conrad kum u nongïalam ki MLA ka NPP bad kum u Myntri Rangbah.
Katkum ka jingsngap thuh ïa ki jingïakren sharum shaneng, lada ka UDP ka la rai ban shong ha ka liang pyrshah naduh ba sdang, kan jin da la long kaba suk ïa ka ba kan rah ïa u ‘nam jop ha ka ilekshon ha Sohïong. Hynrei ka jingkloi palat ban leit ïasoh bad ka sorkar MDA 2.0 ka lah ban ktah kylla ïa u kyrtong ka seng. Baroh ki tip ba ka NPP, UDP, HSPDP, BJP, PDF ki ïatreilang ha kane ka sorkar thymmai watla ki lah ban ïakhun pyrshah iwei-ïa-iwei pat ha ka ilekshon. Ka don ka jingsngew ba kam don jingpher satia lada jied ïa kano-kano ka seng kaba don ha ka sorkar namar baroh ki la ïa long kumjuh lut. Lada jied ïa u kyrtong NPP ruh un don ha ka sorkar, UDP ruh kajuh lane HSPDP lane BJP. Lehse ka UDP ka la bakla shibun ha ka jingshim rai ban leit pynïasoh bad ka MDA 2.0. Hynrei ngin hap ban ïa peit bad ap ïa ka rai jong ki nongthep ‘vote’ ka Sohïong.
Ha ka saiñpyrthei, ka rai ba shim ha ka shi khyllipmat, ka lah ban pynkylla – na ka bynta ka jingbha lane na ka bynta ka jingsniew. Teng-teng ka jingbam ja khluit ka wanrah ïa ka jingtyrha bad ka don ka jait jingtyrha kaba da neh kham slem. Kum ki briew kiba don ha ka saiñpyrthei, ki dei ban long kiba ïohi jngai ban ïa kiwei pat. Lada kita ki nongïalam saiñpyrthei kim lah ban peit ïa kaba sha jngai, ka jingma ka ap lypa ïa ki. Lada ka UDP ka la shim rai ban shong ha liang pyrshah, katta ka jingïakhun ha Ïingdorbar Thawaiñ kan jin da long kaba itynnad namar kan don haduh 25 ngut ki MLA katba ka liang synshar kan don 34 ngut, bad lada ka jingmih na ka ilekshon na Sohïong konstitwensi ka long kaba bha na ka bynta ka UDP, kan don bha ka lad ban pynthymmai ïa ka sorkar. Ngin hap ban ïa peit bad ap kaei ka ban jia ha kine ki sngi khamtam ynda la dep ka ilekshon ha Sohïong.
