Guwahati, Iaiong:
Uwei na ki nongsaiñ pyrthei ka seng BJP uba na Mariani constituency, u Rupjyoti Kurmi ula ai jingmut ia u Myntri Rangbahduh ka ri ban pynpra bad pynjulor noh ia ka Taj Mahal ha kaba ha ka jaka jong ka yn tei noh da kawei ka temple bad kane ka jingai jingmut u Kurmi ka dei ruh ban pynduh pyndam noh syndon ia kiei kiei kiba iadei bad ka Mughal History.
Nalor ka Taj Mahal u Kurmi ula ai jingmut ruh ban pynpra noh ia u Qutub Minar bad sngew ba ki Mughal kiba la wan ban synshar ia ka India ha u snem 1500 ki don da kawei ka jingthmu ban wan sha kane ka ri bad kane ka dei ban tuh bad lute hynrei ym ban kyntiew ne ban leh ia kaei kaei kaba bha ia kane ka ri.
Nalor kane u Kurmi ula ong ruh ba ki khynnah skul kim dei shuh ban pule halor ki syiem bad ka hima Mughal hynrei ki dei ban tip bad pule shaphang ki Syiem Hindu bakhraw.
U Kurmi ula ai jingiaroh ruh ia ka sorkar kmie kaba la phah ban weng noh ia ka Mughal History na kiba bun ki kot pule bad ong ba ka la leh ia kaei kaei kaba dei na ka bynta ki khynnah pule.
U Kurmi u sngew ba lada pynjulor noh ia ka Taj Mahal bad Qutub Minar dei ban tei da ki Temple kiba itynnad kiba yn ithuh da ka”UNICEF” bad ki ban iohrung ruh ha ka “Guinness World Record” bad ong ba u kloi ban ai ia ka tulop baroh shisnem lada tei ne shna temple ha ki jaka ba don kitei ki jingtei ban pynduhnoh ia kaei kaei kaba la tei naduh ka jingsynshar ki Mughal.
