Guwahati, ïaïong:
Ka jingtwa bad tuid jong ka ïor ha ki bynta jong ki lum Nathu La kaba don ha Sikkim ha ka sngi Ba-ar ka la shim ïa ka jingim jong ki 7 ngut ki briew, kynthup ïa iwei i khyllung bad kawei ka longkmie, katba kiba bun kiwei pat ki la sahkut hapoh ka jingtwa jong ka ïor. “Ka jingtwa kaba shyrkhei ka la ktah jur ïa ki nongjngohkai pyrthei hapdeng ka Mile 13 & 17 ha surok Gangtok-Natu La Road.
Ki shipai jong ka kynhun Trishakti Corps ki la ïoh jingïarap na ka kynhun BRO, SDRF bad ki pulit ka thaiñ na ka bynta ban ai jingïarap bad pyllait im ïa ki lanot. Ki la don kumba 27 ngut ki briew kiba la shah pyllait im ha kaba na kine 7 ngut ki la khlad noh ha ka jingjia kaba sengewsih. Ka jingpyntreikam ha ka ban ïarap bad pyllait im ïa ki briew ka dang ïai bteng,” la ong ka tnat shipai Indian Army ha ka jingpyllait khubor lyngba ka Twitter.
Kumba la antad la ong ba ki la don kumba 5-6 tylli ki kali kiba la kit ïa ki 20-30 ngut ki nongjngohkai pyrthei kiba la don ha ka lynti ïaid sha Nathu La la suba ba ki la sahkut hapoh ka jingtwa, la ong ka tnat shipai. Ka jingwad bad jingpyllait im ïa ki briew ka dang ïai bteng ha kaba ki shipai ka kynhun Border Road Organization, ki pulit bad ki shipai ka tnat Indian Army ki la don bynta.
“Ki la don sa kumba 350 ngut kiwei pat kiba la sahkut lynti ïa kiba la shah pyllait hadien ba la dep ban pynkhuid ïa ka jingtwa na ka surok,” la ong u Lt Col Mahendra Rawat.
Ka jingtwa ka la ktah jur ïa ka thaiñ haba kiba bun na ki nongjngohkai pyrthei ki la don hajan ki jaka lum ba la tap da ka ïor ha ki bynta jong ka Jawaharlal Nehru Marg kaba la pynïasoh bad ka Gangtok sha ki jaka jngohkai pyrthei jong ka Tsomgo Lake bad ka khappud Nathula. Kane ka jingjia ka la jia ha ka surok 15-17 Mile jong ka Jawaharlal Nehru Marg ha ka por 12.15 nohphai sngi, ka jaka kaba jngai kumba 25 km na Gangtok.
Kum shi bynta ban pynpaw ka jingsngewsih halor ka jingjia, u Myntri Rangbahduh u Narendra Modi u la pyntikna ban ai bad pynbiang ïa baroh ki jingïarap sha kito kiba la shah ktah jur”. “Ka la long ka jingsngewsih halor ka jingjia ha Sikkim. Ka jingsngewlem na ka bynta kito kiba la duhnoh ïa ki baïeid-bathoiñ jong ki. Nga kyrmen ba kito kiba la mynsaw kin sa koit kloi. Ki jingpyntreikam ha kaba ïadei bad ka jingpyllait im ïa ki briew ka dang ïai bteng bad la ïaleh ban pynbiang bad ai jingïarap sha kito kiba la shah ktah jur,” la ong ka jingthoh kaba la wan na u Myntri Rangbahduh lyngba ka Twitter.
