Imphal, Iaïong:
Ki bor pahara jong ka jylla Manipur ha ryngkat ka jingïatreilang bad ki bor pulit jong ka jylla Assam ha ka sngi Balang mynta ka taiew ki la lah ban weng noh ïa ki diengpyngkiang baroh kiba ïadei bad ka mokotduma jah rngai jong kawei ka kali puh shilum kaba la shah rong tuh na ka jylla Assam.
Kat kum ki jingïoh lum khubor la ïathuh ba ïa ka jing-leit khynra la pynlong lang da ka kynhun Anti Vehicle Theft Cell jong ka tnat pulit Assam lem bad ki bor pulit ka Tungjoi police station jong ka jylla Manipur hadien ka jingïoh ïa kawei ka jingujor na uwei u briew uba la tip kyrteng kum u Ramchandra Chouhan na ka jylla Assam uba la pyntip ruh ba ka kali JCB ka jong u ka la shah rong tuh ha ki runar ki bym shym la tip ki dei kiei. Na ka liang u tei u rangbah u la pyntip ruh ba ïa ka kali JCB jong u la suba ba la leit ban pynpoi sha ka jylla Manipur na ka bynta ban pyntrei ha kawei ka kam tih khyndew.
Hadien katei ka jingujor, la ïathuh ba na ka liang ka kynhun pulit jong ka thaiñ Senapati District a ryngkat bad ki bor pulit jong ka jylla Assam ki la leit ban pynlong ïa ki jingkhynra kiba jur ha kylleng ki thaiñ jong ka Senapati District ban lap dien ïa katei ka kali ouh shilum.
Dei ha ka sngi Balang mynta ka taiew, ba ki bor pulit ki la lap biang ïa katei ka puh shilum kaba la ieh noh da ki runar hadien ba ki la pyndonkam ïa ka ha ki kam tih khyndew ha ka shnong New Lai, Senapati district. Ki bor pulit ki la lap biang ïa katei ka puh shi lum ha ka por kumba 7 baje mynstep.
Halor katei ka jingjia, na ka liang ki bor pulit ki la pyntip ba ki la dep ban pynrung da ka FIR bad ki la pynsdang ruh ïa ki kam tohkit khnang ban ïoh kem ïa ki runar kiba la donkti ha ka kam beaiñ.
Ïa katei ka puh shilum la ïathuh ba na ka liang ki bor pulit ki la leit ban aiti noh sha u Ramchandra Chouhan bad na ka liang ka jong u, u la pynpaw ïa ka jingsgewnguh kaba khraw ïa ka jingshim khia jong ki bor pulit ka jylla Assam bad Manipur ban lap biang ïa ka kali puh shilum ka jong u.
