Tinsukia, Iaïong:
Ki bor pulit jong ka jylla Assam ha kane ka taiew kaba mynta ki la ïoh ban pyllait im ïa ki 11 ngut ki khynnah rit (kynthei bad shynrang) kiba dei na ka thaiñ Tinsukia District bad kiba shah khaïi bad pynïaid iew beaiñ sha kiwei pat ki jylla jong ka thaiñ shatei lam mihngi.
Halor katei ka jingjia, na ka liang ki bor pulit jong ka jylla Assam ki la ïoh ruh ban kem ïa ki 2 ngut ki riew sniew kiba la donkti ha ki kam ban rahbor bad pynïaid iew beaiñ ïa kitei ki khynnah rit. Ki 2 ngut ki riew sniew kiba la shah kem ki kynthup ïa u Deep Jyoti Gogoi – nongshong shnong ka thaiñ Lakhimpur district bad u Dipak Karmakar – nongshong shnong ka thaiñ Luhali Bast, Tinsukia District.
Kat kum ka jingpylllait kyrwoh jong u Superintendent ka tnat pulit Tinsukia – Abhijeet Gurav u la pyntip ba hadien ka jingïoh ïa ka jingujor ha Doomdooma police station, ki bor pulit ki la leit ban pynlong ïa ka jingkhynra bad ïoh ban pyllait im ïa ki 10 ngut ki khynnah rit na ka shnong Taksing Basti kaba don ha ka thaiñ Upper Subansiri District, Arunachal Pradesh. U heh pulit u la pyntip shuh shuh ba baroh ki khynnah rit kiba la ïoh ban pyllait im ki dei ki nongshong shnong ka thaiñ Lohari Basti, Talap.
Haba batai bniah halor katei ka jingleit khynra, na ka liang u investigating officer – Sub-Inspector Dilip Das u la pyntip ba ki runar ki la donkti ha katei ka kam beaiñ kham bunsien ki ju peit bad phaikhmat sha ki khynnah rit kiba dei na ki longïing longsem kiba duk ba kyrduh bad pynbiej ïa ki ba kin pynbiang ïa ki kam ki jam ha ka shnong Silapathar, Assam. Hynrei kitei ki runar ki la leit ban ïalam jubor ïa ki khynnah rit sha ka shnong Taksing Basti, Arunachal Pradesh ha kaba la pyntrei jubor ban ïarap ïa ki kam ïïng kam sem jong ki katto katne ki longïïng jong katei ka thaiñ.
Ha ka jingleit khynra la ïathuh ba ïa u Das la leit ban synran lem da u WC Saraswati Upaddhayay na Talap police Outpost bad kumjuh ruh da u OC jong ka Nacho police station – ASI Nido Talar.
Na ka liang u heh pulit u la pyntip shuh shuh ba ïa ka jingleit khynra kaba jur la pynsdang ha ka 31 tarik u Lber bad hadien 72 kynta ki la ïoh ban pyllait im ïa ki 10 ngut ki khynnah rit bad ha ka Lah Sngi U Blei mynta ka taiew la leit ban ïalam biang sha ka jylla Assam bad leit ban aiti noh sha ki bahaïing hasem jong kitei ki khynnah rit. U heh pulit u la pyntip shuh shuh ba ha ka jingleit khynra jong ki, ka la don ruh kawei ka khynnah rit kaba la lait phet bad na ka liang ki bor pulit ki la pynlong ïa ka jingleit thwet khnang ban lap biang ïa ka.
U heh pulit ha ka jingpyllait kyrwoh jong u, u la pyntip shuh shuh ba ha ka por ba ki bor pulit ki la leit ban pynlong ïa ki jingtohkit na ki kmie ki kpa jong kitei ki khynnah rit, kiba bun na ki ki dei ki nongtrei bylla sngi ki la pyntip ba ki khun ki kti jong ki ki la shah patan jubor ha ki runar. Hynrei kat kum ka jingtohkit na kitei ki khynnah rit, ki bo pulit kim shym la shem eiei shaphang katei ka jingdonkti tan jubor jong ki riew runar.
Halor katei ka jingjia, na ka liang ki bor pulit ki la dep ban pynrung da ka mokotduma kaba thymmai bad pyntip ruh ba ki la pynsdang ïa ki kam tohkit khnang ban ïoh kem biang sa ïa kiwei kiwei ki runar kiba donkti ha katei ka kam beaiñ bad kumjuh ruh na ka bynta ban ïoh pyllait im sa ïa kiwei kiwei ki khynnah rit kiba la ngat ha katei ka lano.
