Imphal, Iaïong:
Ki bor pulit jong ka jylla Manipur ha ka 5 tarik mynta u bnai ki la pyntip ba ki la ïoh ban kem ïa uwei u nongïalam jong ka seng kieng atiar Kanglei Yaol Kanba Lup (KYKL) na kawei ka kyntoit kaba don ha ka nongbah Imphal. Ïa utei u ehrang la ïoh ban kem hadien ba ki bor pulit commando ka thaiñ Imphal West district police ki la leit ban pynlong ïa ka jingkhynra ha kawei ka jaka sangeh kali kaba don ha Keishampat Churachandpur ha ka por kumba 5:30 PM.
U dkhot ka KYKL u ba la shah kem ha katei ka sngi u dei u ba la tip kyrteng kum u Loukrakpam Tangba (41 snem ka rta) u ba dei trai na Bishnupur Maning Leikai Ward No 3, Birshnupur district.
Ki bor pulit ki la pyntip ruh ba utei u ehrang u la leit ban pynïasoh bad ka seng KYKL ha u snem 1998 bad u la pyndep ïa ki jinghikai kilan met bad 38 ngut kiwei pat ki dkhot jong ka seng KYKL ha kawei ka ktem kaba don ha ka thaiñ Khoupum, Noney district bad ïoh ruh ban bat ïa ka kyrdan kum u major jong ka seng. Ki la pyntip shuh shuh ba utei u ehrang u la trei ïa ki kam beaiñ jong ka seng hapoh ka jingkhmih bad jingpynïaid jong u wei u nongïalam u ba la tip kyrteng kum u Ingba (Colonel).
Kat kum ka jingtohkit jong ki bor pulit, ki la pyntip ba u Tangba u la wan rung sha Manipur na ka ktem Tanan kaba don ha Myanmar na ka bynta ban pyndep ïa ki kam beaiñ jong ka seng. Ïa ut ei u ehrang u ba la shah kem la leit ban aiti noh sha ki bor pulit ka Imphal PS na ka bynta ki kam tohkit kiba dang sah.
