Guwahati, Iaïong:
Ka tnat pulit jong ka jylla Assam ka la ioh ban kurup ia ki dawai jyrhoh na kawei ka jaka kaba hap hapoh u pud u sam jong ka Assam bad Tripura na Karimganj.
Kane ka kynhun kala lah nang thwet naduh ka miet jong ka lah sngi u Blei, ha kaba la ioh ban kurup haduh palat 20,000 bilor ka Phensedyl kaba long ka dawai jyrhoh, ia kaba la kot ruh shaduh ka 10 lak baroh.
Haba iadei bad kane, ki tnat pulit ki la bud dien ia kawei ka kali kaba kit ia kitei ki dawai jyrhoh ha katei ka miet bad la ong ruh ba katei ka kali ka la kit ia kitei ki dawai naduh Guwahati sha Agartala.
Ia u nongñiah jong katei ka kali la tip kum u Ranjit Baishya bad la ong ba katei ka dawai jyrhoh ka dei kaba la khang hapoh ka jylla bad ha ka ri baroh kawei bad la khang pyrshah ban pyniaid iew lane ban iadie- iathied ia katei ka dawai hapoh ka jong ka Ri. Namar la ong ba katei ka jait dawai ka long kaba sniew khamtam ia ki khynnah samla, lada kin pyndonkam ia ka. La ong ruh ba katei ka dawai ka lah ban pynsniew ia ka met ka phad bad ka pyn kyrni ruh ia u briew uba dih bad pyndonkam ia ka. Lah ruh ban ong ba ia katei ka dawai Phensedyl, la ju pyniaid iew na India ban shalan sha Bangladesh. Kumta la ong ba ki tnat pulit bapher jong ka jylla bad kumjuh ruh na ka liang ki pulit khappud, ki ju ialeh katba lah ban peit thuh ban ban tehlakam ia ka jingrung kyrthep jong ki nongkhaii drok bad ki nongkhaii be-aiñ haba iadei bad katei ka kam.
