Guwahati, ïaïong:
Ki pulit jong ka Assam ki la kem ïa ki ar ngut ki heh nongïalam jong ka seng Popular Front of India (PFI) kaba la shah ñiew beaiñ ha ka sorkar.
Kine ar ngut ki heh nongïalam jong ka seng PFI ki la shahkem na Barpeta distrik ha Assam. Ïa kine ki arngut kiba la shahkem la tip kyrteng kum u Abu Sama Ahmed bad u Jakir Hussain.
U Abu Sama Ahmed u la long u President jong ka seng PFI ha Assam bad u Jakir Hussain u la long u State Secretary jong ka seng. Nalor kane, ki pulit jong ka Assam ki la ïoh ruh ban kem ïa u dkhot jong ka seng Campus Front of India (CFI). Ïa une u dkhot jong ka seng CFI uba la shahkem la tip kyrteng kum u Jahidul Islam Mirdha.
U Jahidul Islam Mirdha, ïa uba la shahkem na Barpeta distrik ha Assam, u dei u nongbat pisa jong ka seng CFI. Ki pulit ki la ïoh ban kurup ïa ka pisa kaba T. 1.50 lak, saw tylli ki Mobile Phone bad ki kot lyngkniap jong ka Social Democratic Party of India (SDPI) hadien ba la khmih bniah na une uba la shahkem. Kum ban shu pynkynmaw, la ong ba ka sorkar kmie, ha u Nailur jong u snem ba la lah, ka la ñiew beaiñ ïa ka seng PFI hapoh ka jingtreikam jong ka Unlawful Activities (Prevention) Act.
