Bishnupur, Iaïong:
Ha ki khyndiat por ba la leit, uwei u rangbah 33 snem ka rta, u la pyniap ia la ka jong ka kurim kaba dang 25 snem ka rta ha Manipur, hashwa ba un leit pyndem noh ialade hakhmat ki pulit. Kumta ruh la kem bad tohkit bniah ia u, ha kaba yn sa leit rah hajir ia u hakhmat ka iingbishar ka Manipur ha ka 15 tarik jong une u Iaiong.
Katkum ki khubor la iathuh ba katto katne ngut ki longkmie ki la mih shakhmat ban pyrshah jur halor katei ka jingleh donbor jong utei u briew, khlem da kheiñ shuh wat ia la ka jong ka kurim bad kumta ruh ki la leit ban dawa ia ka iingbishar ha Bishnupur ba kan pynioh ia ka hok halor ka jingshah pyniap jong katei ka longkmie 25 snem.
Ha ka Sngi U Blei jong ka taiew ba la lah, ki nongialam jong ka Joint Action Committee (JAC) ki la leit ban kynduh ia u Myntri Rangbah ka jylla u N. Biren Singh ha ka ophis treikam jong u haba iadei bad ka jingiakhun ban pynioh ia ka hok halor ka jingshah pyniap katei ka longkmie, ia kaba la ithuh kum ka Ningthoujam Asha Devi.
La ong ruh ba katei ka Committee ka la dawa ba dei ban rai pyniap ia utei u rangbah uba don kti ha ka jingpyniap ia la ka jong ka kurim.
Kumjuh ruh na ka liang u Myntri Rangbah ka Manipur, u la ong ba ka Sorkar Manipur kan ialeh katba lah ban pynkloi bad ban pynioh ia ka hok jong katei ka longkmie kaba la shah shim jubor ka jingim ha la u jong u kurim ha ki khyndiat por ba la leit.
Ha kajuh ka por ruh u la phah ia ka khubor sngewlem sha ka iing jong katei ka longkmie halor ka jingduh noh jongki ia katei ka longkmie ha kum katei ka jingjia kaba sngewsih bad ka bym lah ban mutdur bad kumta ruh u la ong ba ka Sorkar kan ym ailad ia kum kitei ki jingjia ba kin dang jia biang nangne shakhmat bad kumta ruh yn shim ia ki rai pynshitom katkum ki kyndon pynkheiñ aiñ kiba iahap bad ka jingleh pynkheiñ aiñ jong u.
La ong ba utei u rangbah u la leit ban pyndem hi ialade hakhmat ki pulit tang mar iadep ban leh ia katei ka kam pyniap briew ha katei ka sngi.
Ki pulit ki la iathuh ba kane ka la jia ha ka 26 tarik u Lber bad ha ka por kumba 6:30 mynstep, hapoh ka thaiñ Ningthoukhong Mamang Lamyai Taothabi pat, hajan ka Loktak Lake jong ka distrik Bishnupur hapoh Manipur.
Ia utei u rangbah pat la ithu kyrteng u Heisnam Bigyananda uba dei na Lamyai Taothabi pat bad uba la don 33 snem ka rta bad u la dung iap ia la ka jong ka kurim da ka tari katba ki dang thmu ban leit sha ka jaka leit bar da ka lieng ha katei ka por.
