Agartala, Iaïong:
Ki bor pulit jong ka jylla Tripura ha ki khyndiat sngi kiba la leit noh ki la kem ïa ki 8 ngut ki briew na ka daw jong ka jingdonkti jong ki ban pynïap ïa kawei ka longkmie hadien ka jingsuba ba katei ka longkmie ka dei ka nongleh byrtong.
Kat kum ka jingïathuh jong ki bor pulit, kitei ki 8 ngut ki runar ki la donkti ban pynïap ïa katei ka longkmie ha ka shnong Behalabari, Khowai district jong ka jylla Tripura.
Ki bor pulit jong ka jylla ki la pyntip ruh ba katei ka jingjia ka la jia ha ka miet jong ka Sngi Palei kaba la dep (6 tarik) ha ka kyntoit Lengtibari, Behalabari, Khowai district. Ki bor pulit ki la pyntip ruh ba na ka liang ka jong ki ki la ïoh jingtip ba kawei ka kynhun ka la rahbor ïa kawei ka longkmie bad donkti ban pynïap ruh ïa ka. Ki la ïathuh ba halor katei ka jingïoh jingtip, ki la pynlong ïa ki jinglum jingtip bad sdang ruh ïa ki kam leit thwet hynrei kim shym la lap dien shuh ïa katei ka longkmie lane ïa ki runar kiba la donkti ban rahbor ïa ka.
Ki bor pulit jong ka jylla ki la pyntip shuh shuh ba hadien ki jinglum jingtip kiba bniah ki la kem ruh ïa ki katto katne ngut ki samla na katei ka shnong bad na ka jingtohkit pyrshah ïa ki, ki la phla ba ki la dep ban pynïap ïa katei ka longkmie. Ki bor pulit ki la pyntip hadien ka jingtohkit ïa kitei ki samla, ki la leit ban tam noh ïa ka metïap jong katei ka longkmie kaba la buhrieh bad tep ha kawei ka jaka leit shabar kaba la khang khyrdep.
Ka longkmie kaba la shah pynïap ka dei kaba la tip kyrteng kum ka Kaushalya Ghatual (45 snem ka rta).
Ki 8 ngut ki runar kiba la shah kem na ka daw jong ka jingdonkti jong ki ha katei ka kam beaiñ ki kynthup ïa u Charitra Kanda (40 snem ka rta), Mithun Kanda (18 snem ka rta), Akash Kanda (18 snem ka rta), Kajal Kanda (65 snem ka rta), Sanjit Kanda (20 snem ka rta), Bimal Kanda (19 snem ka rta), Ajit Kand (25 snem ka rta) bad u Chandan Tanti (35 snem ka rta).
Halor katei ka jingjia, na ka liang ki bor pulit jong ka jylla ki la pyntip ba ki la dep ban pynrung da ka mokotduma pyrshah ïa kitei ki runar bad la pynsdang ruh ïa ki kam tohkit pyrshah ïa ki.
