Rong tuh ki dkhot ka KIA/KIO ïa ki tiar siat jong ki seng kieng atiar ba dang don hapdeng ka soskular sangeh ïasiat

Imphal, Iaïong:

Ki runar ïa kiba la suba jur ba ki dei ki dkhot jong ka seng kieng atiar Kuki Independent Army/Kuki Independent Organisation (KIA/KIO) ha ka 9 tarik mynta u bnai ki la leit ban khynra bad rong tuh ïa ki tiar siat jong ki seng kieng atiar kiba dang don hapdeng ka soskular sangeh ïasiat bad ka sorkar Manipur.

Kat kum ki jingïoh lum khubor la ïathuh ba ki dkhot jong ka KIA/KIO ki la donkti ban rong tuh ïa haduh kumba 25 tylli ki siat siat na ki shlem treikam jong kitei ki seng kiba dang don hapdeng ka soskular sangeh ïasiat bad ka sorkar jylla, kiba don ha ka thaiñ Churachandpur jong ka jylla Manipur.

Kum ban shu ïathuh hangne, ka seng kieng atiar KIA/KIO ka dei kawei na ki seng kieng atiar jong ka jylla Manipur kaba ym shym la don bynta ha ka ban soi ïa ka soskular sangeh ïasiat (Suspension of Operations) bad ka sorkar.

Kat kum ka jingïoh lum khubor la ïathuh ba ka jingshah rong tuh jong ki tiar siat ka la jia ha ka step phyrngab jong ka Sngi U Blei ba la dep (9 tarik).

Kat kum ki jingïoh lum khubor la ïoh jingtip ruh ba ki dkhot jong ka KIA/KIO ki la leit ban tur thma bad thombor pyrshah ïa ki dkhot jong ki seng kieng atiar kiba shong bas ah ha Chungkhao, Henglep sub-division jong ka thaiñ Churachandpur district, Manipur – ka thaiñ kaba don markhap bad ka ri Myanmar.

Kum ban shu ïathuh hangne, ha ka shlem kaba don ha ka thaiñ Chungkhao, Churachandpur district jong ka jylla Manipur la shong la sah da ki 25 ngut ki dkhot jong ki seng kieng atiar Kuki bapher bapher kiba dang don hapdeng ka soskular sangeh ïasiat bad ka sorkar pdeng lem bad ka sorkar jong ka jylla Manipur.

La ïoh jingtip ruh ba ki dkhot jong ka KIA/KIO ha ryngkat ki tiar siat kiba ki la ïoh ban rong tuh ki la lait ban phet da kaba suk khlem da don kano kano ka jingjia kaba wanrah ïa ka jingïaumsnam.

Katei ka jingjia shah rong tuh jong ki tiar siat na katei ka shlem ka la jia tang hadien 3 sngi ba ki bor pulit jong ka jylla Manipur ki la pynbna paidbah ba kin ai da ka khusnam/buskit kaba haduh T.50,000 sha kino kino ki briew kiba lah ban wan ai ïa ki jingtip kiba bniah na ka bynta ban ïoh kem ïa u nongïalam jong ka seng KIA/KIO, u Thangkhongam Haokip (40 snem ka rta).

Ka shlem treikam kaba la ngat hapoh ka jingjia shah rong ruh jong ki tiar siat ka dei ka shlem ba la shong la sah da ki dkhot jong ka seng United Socialist Revolutionary Army (USRA), Kuki National Front (KNF), United Tribal Liberation Army (UTLA) bad ki dkhot jong ka seng Kuki National Front (Zougam)/KNF-Z.

Halor katei ka jingjia, la ïathuh ba na ka liang ki bor pulit jong ka jylla ki la pyllait da ka ‘red alert’ na ka bynta ban lap dien biang ïa kitei ki tiar siat kiba la shah rong tuh.

Ki la pyntip ba na ka liang ka jong ki, ki la dep ruh ban pynrung da ka mokotduma na ka bynta ban pynlong ïa ki jingtohkit kiba dang sah.