Srinagar, Jymmang:
Ka kynhun National Investigation Agency (NIA) ka la pynlong ïa ka jingleit khynra sha kiba bun ki jaka kiba don ha ka thaiñ Kashmir hynnin ka step ha kaba ïadei bad ka jingdon jong ka jingjia thong pisa halor ki kam pyntriem jong ki lehnoh bad kem ruh ïa uwei u briew na ka bynta ban pynlong ïa ka jingtohkit, la ïathuh ki heh jong ka kynhun.
Ïa ka jingleit khynra la pynlong sha kiba bun ki shnong kiba don ha ka thaiñ Srinagar, Awantipora, Pulwama, Kulgam bad Anantnag.
Uwei u briew u la shahkem na ka bynta ban tohkit da ka kynhun National Investigation Agency (NIA) na ka thaiñ Sozeith jong ka Srinagar, la ïathuh ki heh jong ka kynhun.
Ïa une u briew uba la shahkem la tip kyrteng kum u Ishaq Ahmad Bhat.
“Ka kynhun NIA ka la wan mynstep hapdeng ka por 5.30 bad 6.00 baje. Ki la kylli jingkylli na u Ishaq bad rah ïa u ha ryngkat ka Mobile Phone jong u. Une u la trei kum u nongbylla,” la ong u Mohammad Ramzan Bhat, uba dei u kpa jong une u ba la shah suba donkti bad ki lehnoh.
“Ngim shym donkti ei ei bad ki lehnoh ne don bynta ha ka jingïakawang maw,” u la bynrap. U Bilal Bhat, uba dei u hynmen jong une uba la shahkem, u la ong ba u Ishaq u dei u briew u bym don jingnang jingstad bad u la trei kum u nongpyndait ïit.
