New Delhi, Jymmang:
Ki pulit jong ka Delhi ki la kem ïa uwei u briew uba la shah pynshisha ba u la khaïi tuh ïa palat 200 tylli ki pistol sha ki runar jong ka nongbah New Delhi bad NCR ha ki 7 snem ba la leit.
Ki pulit ki la kem noh ïa une uba la shah kynnoh ïa uba la tip kyrteng kum u Manish Pandey, bad ïa arngut ki nongïarap jong u bad ïoh ban kurup kumba 10 tylli ki pistol bad ki kuli ïasiat na ki.
Kumba la ïathuh ki heh pulit, la ong ba u Manish u la thmu ban phah ïa ki tiar siat sha uwei u runar ïa uba la tip kyrteng kum u Jaggu Bhagwanpuria jong ka Punjab. Kane ka jingshahkem jong u ka la long hadien ba ka kynhun Special Cell of Delhi Police ha ka 26 tarik, Ïaïong, ka la ïoh jingtip ba u nongkhaïi tiar siat u la wan na Delhi ha kaba u la don ïa ka song ba la khaïi beaiñ ïa ki tiar siat.
Ki pulit jong ka Delhi ki la kem noh ïa u Manish Pandey ha ryngkat 7 tylli ki pistol naba la lap ïa u hadien ka jingkhang kdong hajan Millennium Park. Ha ka por ba la pynlong ïa ka jingtohkit, u Manish u la ong ba u la rah ïa baroh kine ki pistol na Madhya Pradesh ha kaba u la ïathuh ba u la thmu ban phah ïa ki sha uwei u dkhot jong ka kynhun runar u Jaggu Bhagwanpuria ha Noida kaba don ha UP bad Punjab.
Kumjuh ka kynhun jong ki pulit ka Delhi ka la kem noh ïa u dkhot jong ka kynhun u Jaggu Bhagwanpuria u Pradeep Singh bad la ïoh ban kurup lai tylli ki pistol na u. Ki pulit ki la kem ruh ïa uwei pat u nongïarap jong u Manish Pandey, u Indrajeet. Ki pulit jong ka Delhi ki la lap ba u Manish u la die ïa palat 200 tylli ki tiar siat sha ki runar kiba ha Delhi bad ha ki bynta ba marjan ha ki 7 snem ba la leit.
U Manish, u dei u nongshong shnong jong ka Auraiya kaba don ha Uttar Pradesh, ha kaba u la ju rah ïa ki tiar siat na Madhya Pradesh bad die ïa ki sha ki runar kiba ha Delhi bad ha ki bynta ba marjan. Shuh shuh la ïathuh ba ki la don kumba 10 tylli ki jingmudui ïa kiba la dep ban mudui hashwa pyrshah ïa u Manish hashwa kane ka jingjia kaba mynta.
