New Delhi, Jymmang:
Ka India haduh mynta ka la ïoh ban pyllait ïa 3,195 ngut ki nong India na ka jaka ba la khie ka thma ha Sudan, ha kaba la kit ïa ki ha ka jingjngai kaba 850 km na Khartoum sha ka jaka sangeh jhad jong ka Sudan ha palat 60 tylli ki bus.
Ki la don kumba san tylli ki jhad jong ki shipai duriaw bad 13 tylli ki liengsuiñ jong ki shipai ka tnat Indian Air Force ïa kiba la pyntreikam haduh mynta, la ong ka Indian Embassy ha Sudan.
Katei ka Embassy, ïa kaba dang shen la pynkynriah shipor sha ka jaka sangeh jhad jong ka Sudan na jingdon ka jingïakynad ki kynhun shipai ha Khartoum kaba dang ïai bteng haduh mynta, ha ka jingphah jingthoh lyngba ka Twitter ka la ong: “Ka la dei ka jingpyntreikam hapoh ka ‘Operation Kaveri’ kaba la ïaid 8 sngi.”
“Ka jingïakynad ha Khartoum bad ha kiwei pat ki bynta jong ka Sudan ka la sdang ha ka 15 tarik, Ïaïong, 2023. Ka sorkar India ka la wanrah da ka ‘Operation Kaveri’ bad pyndonkam ruh da ki jhad jong ki shipai ka tnat duriaw bad ki liengsuiñ jong ki shipai ka tnat Indian Air Force na ka bynta ban leit pyllait bad kit ïa ki nong India kiba dang sahkut ha Sudan.”
Ka Embassy of India ka la lah ban pyllait ïa ki nong India ha ka sien kaba nyngkong ha ki 6 tylli ki bos ha ka 23 tarik, Ïaïong, 2023 na Khartoum sha ka jaka sngeh jhad ha Sudan.
Da ka jingïarap ki Sisters kiba dei ki nong India ha Comboni School bad ka kynhun jong ki nong India ha Port Sudan, ka Embassy of India ka la buh kawei ka jaka ha Comboni School na ka bynta ban ai jaka sah ïa ki nong India bad ban ïoh ban pynphai ïa ki sha kane ka ri lyngba ki liengsuiñ bad ki jhad.
Ka kynhun kaba nyngkong jong ki nong India ban shah pynphet na Sudan ki dei kiba la shah kit ha ka INS Sumedha ha ka 25 tarik, Ïaïong, 2023.
“Ka kynhun MEA ka la poi ha Port Sudan ha ka INS Teg ha ka 25 tarik, Ïaïong, 2023 kum shi bynta ban nang pynkhlaiñ shuh shuh ïa ka jingpyntreikam. Kumba ka long mynta, ïa ka Indian School ha Port Sudan la pyndonkam kum ka jaka sah jong kine ki nong India kiba dei ban shah pynphai na Sudan, ha kaba la pyntreikam ha ka ban shim kyrteng ïa ki nong India kiba la dei ban shah pynphai. “
Haduh ka sngi kaba 8 jong ka jingpyntreikam ïa ka Operation Kaveri, ki la don haduh mynta kumba 3,195 ngut ki nong India kiba la shah pyllait.
Ka Embassy of India ka la pyntreikam ha ka ban phah ïa ki 62 tylli ki bos na kiba bun ki bynta jong ka Sudan ba kin poi ha Port Sudan.
Ka Embassy of India ka la ïarap ruh ha ka ban phah ïa ki nong India sha South Sudan, Egypt, Chad bad Djibouti.
“Ka Embassy ka la ai jingïarap ruh ïa kiwei pat ki nongshong shnong jong kiwei pat ki ri kynthup ïa ki nong Sri Lankan, Nepal bad Bangladesh. “
Haduh mynta ki nong India ki la leit sha Port Sudan ha kaba ki la pyndonkam ïa ki san tylli ki jhad jong ki shipai duriaw jong ka ri bad 13 tylli ki liengsuiñ jong ka tnat shipai Indian Air Force kynthup kawei na Wadi Sayyidna Military Airbase.
“U nongaiktien jong ka MEA u Arindam Bagchi ha ka jingphah jingthoh lyngba ka Twitter u la ong: “Ka kynhun kaba 20 jong kito kiba la shah pyllait na Sudan ki la shah kit na Port Sudan. Ka liengsuiñ IAF C-130J ha ryngkat ki 116 ngut ki briew ki la shah pynkit sha Jeddah.”
U Myntri ka tnat korbar ri u S Jaishankar ha ka jingphah jingthoh jong u lyngba ka Twitter u la ong: “Ki la don shuh sa kumba 328 ngut ki briew kiba la poi New Delhi. Ka Operation Kaveri ka la pyntreikam stet bha ha kaba ka la lah ban pynpoi ïa palat 3000 ngut ki briew hapoh ka ri mynta.
