Kolkata, Jymmang:
Ka jingïap jong u nongïalam jong ka seng BJP ha Purba Medinipur kaba don ha West Bengal ka la wanrah ka jingkhihwin ha ka jylla naba ka seng BJP ka la kynnoh ba une u la shah pynïap ha ki dkhot jong ka seng Trinamool Congress, ha kaba hadien kane ka jingkynnnoh, na ka liang ka seng kaba bat ïa ka jingsynshar ka TMC ka la pynshisha ba kine ki jingkynnoh baroh ki dei ki bym don nongrim.
U President jong ka seng BJP ha kane ka thaiñ Moyna, u Bijaykrishna Bhunia, kumba la pynshisha la ong ba u la shah bom shah tied ha ki nongbud jong ka seng TMC hakhmat ka kurim jong u ha ka lynti ban leit phai ïing ha ka janmiet jong ka lah sngi U Blei bad u la shah rah da ka bor ha ki runar ha ka kali arshaka, la pynshisha ka seng BJP.
“Kane ka sngi ka dei ka lyngkhuh snem kaba ar jong ka jingjia ka jingïakynad hadien ka jingthep vote kaba la sdang ha ka jylla ha u snem 2021 ha ka 2 tarik, Jymmang hadien u ba ka seng TMC ka la wan ha ka bor synshar. Ka jingshah pynïap jong u nongïalam jong ka seng BJP u Bijay Krishna Bhunia ka dei ka jingai sngewbha sha ki briew jong ka jylla na ka bynta ban rakhe ïa kane ka sngi,” la ong u nongïalam jong ka seng BJP u Suvendu Adhikari.
Ka seng TMC ka la wan ha ka bor synshar ha West Bengal ha ka sien kaba lai ha u snem 2021.
Ïa ka jingpynbna ïa ki nongjop ha kaba ïadei bad ka jingïakhun ïa ka ilekshon la pynbna ha ka 2 tarik, Jymmang, 2021.
Ka Moyna ka la shah ñiew ba ka dei ka dien ïing jong u Adhikari, bad ka kynhun jong ka seng BJP ka la sngew ba ka la ïoh jingkyrshan shibun.
U nongïalehkai kriket barim bad u nongïalam jong ka seng BJP u Ashok Dinda u la long u MLA na katei ka thaiñ.
U Adhikary u la dawa ba la dei ban don ka jingtohkit jong ka kynhun CBI ha kaba ïadei bad ka jiangjia wat lada ka seng ka la khot pynlong da ka jingkhot pakhang kaba 12 kynta ha ka thaiñ hynnin ka sngi.
Ka seng TMC ka la ong ba kane ka jingkynnoh ka dei ka bym don nongrim bad ka dei ka jingthmu ban leh kam saiñ pyrthei halor kane ka jingjia.
Ïa ka met jong u Bhunia, kaba la don da ki dak mynsaw, la lap ha ka miet jong ka lah sngi U Blei ha ka jaka kaba kham pajih na ka ïingsah jong u, la ïathuh ki pulit.
“Ngi dang pynlong ïa ka jingtohkit kaba bniah ha kaba ïadei bad ka jingjia,” la ong u heh pulit.
U Vice-President jong ka seng BJP ha ka ri bad u MP jong ka Medinipur MP u Dilip Ghosh, u la kynnoh da kaba ong ba ka seng TMC ka la nang pynjur ha kaba ïadei bad ki kam thombor pyrshah ïa ki nongbud jong ki seng kiba dei na ka liang pyrshhah ha ka thaiñ kum shi bynta ban wanrah ïa ki kam pyntriem ha kylleng kum shi bynta ban ïoh ïa ka jingjop ha ka jingïakhun ïa ka ilekshon Panchayat ha ka jylla, ha kaba ka la dei ban sdang kham hadien ha une u bnai.
Kum shi bynta ban kyntait halor ka jingshah kynnoh donkti ha ka jingjia, ka seng TMC ka la pynshisha da kaba ong ba kane ka la long na ka daw ïing daw sem.
“Katkum ka jingïoh jingtip, la ong ba kane ka jingjia ka dei na ka daw ïing daw sem. Ka jingkynnoh kaba long pyrshah ïa ngi ka dei ka bym don nongrim. Ngi ruh, ngi kwah ba ki runar kiba donkti ha kane ka jingjia kin shahkem,” la ong u MLA jong ka seng TMC jong ka Moyna, u Sangram Dolui.
Kum shi bynta ban bynrap halor kane, u General Secretary jong ka seng TMC ha ka jylla u Kunal Ghosh u la ong ba ka seng BJP ka la pyrshang ban pynthoh bria ïa ka jylla.
“Man ba lap ba ki nongbud jong ka seng BJP ki ïap, ki ju kynnoh bad kdew kti beit ïa ka seng TMC khlem ki jingpynshisha, ki la ju jia bun ki jingjia kiba kum kine. Hadien kiba kum kine ki jingkynnoh ki ju paw ba kim dei kiba shisha. Ai ba ki pulit kin pynlong ïa ka jingtohkit bad ban wanrah ïa ka jingshisha baroh halor ka jingjia,” u la ong.
