Panaji, Jymmang:
Ki lanot kiba la ïakynduh jingeh na ka jingshah klun jaka ha Goa ki la pynpaw ba ki la don hapdeng ka jingdumbuit ba ka la jan don shi snem naduh ba ka kynhun SIT ka la shimti ban pynlong ïa ka jingtohkit ha kaba ïadei bad ka jingjia, hynrei haduh mynta ka la paw ba kam pat lah ban pynshisha ei ei ruh em ne bamn ïoh kino kino ki jubab ha kaba ïadei bad ka jingtohkit jong ki.
Khyndiat bnai hadien ba la shimti ban pynlong ïa ka jingtohkit, ka kynhun SIT ka la pynshisha ba ka jingpyntreikam ka la ïaid shakhmat ha kaba ïadei bad ka jingpynlong ïa ka jingtohkit ba bniah halor ka jingdon jong ki kam beaiñ kiba la mih na ki jingkam trai halor ki jaka puta ne ka jingklun jaka.
Naduh ba u Myntri Rangbah jong ka Goa u Pramod Sawant u la dep ban pynbna ba ka sorkar jong u ha ka sien kaba nyngkong ka la buh ïa ka kynhun Special Investigation Team (SIT) na ka bynta ban tohkit ha kaba ïadei bad ka jingkam trai beaiñ ïa ki jaka puta hapoh ka jylla ka jingpyntreikam ka la sdang.
“Ha kaba ïadei bad ka rai kaba kongsan ba la dep ban ai ka sorkar jong ngi ka la rai ban buh da ka kynhun Special Investigation Team (SIT) ha ka jylla ha ka sien kaba nyngkong na ka bynta ban tohkit bniah halor ka jingkam trai beaiñ ïa ki jaka puta ne ka jingai sha kiwei pat da ka lynti kaba long beaiñ. Ka Goa ka la long kawei na ki jylla kaba la donkam eh hadien ka jingïaid lynti ban buddien halor kine ki kam beaiñ ba la long lyngba ka jingkam trai beaiñ ïa ki jaka puta. Ngin ym ieh noh ha kaba ïadei bad kane ka jingpyntreiakm na ka bynta ban ïada ïa ka khyndew jong ka Goa bad ka jingkwah jong ki nong Goa. Ngi la ïaid lyngba kiba bun ki jingjia kiba kum kine ha kaba ïadei bad ka jingai jaka sha kiwei pat da ka lynti kaba beaiñ, kumta ngi la buh da kane ka kynhun na ka bynta ban pynstet ha ka ban leh ei ei ha kaba ïadei bad kine ki jingjia. Nga buh ka jingkyrpad ïa ki briew ba ki dei ban mih shakhmat ha kaba ïadei bad ban leit hakmat ka kynhun SIT na ka bynta ban ai jingtip lada don ki jingjia ba ïadei bad ka jingkam trai beaiñ ne ai nongkynti sha kiwei pat lyngba ka lynti kaba beaiñ,” la ong u Sawant.
Kane ka kynhun SIT ka dei hapoh ka jingïalam jong u Superintendent of Police, Crime branch, Nidhin Valsan, bad don ruh ïa hynriew ngut kiwei pat ki dkhot, kynthup u Deputy Collector jong ka South Goa, u Snehal Prabhu, bad u Deputy Superintendent of Police u Braz Menezes bad ki nongmihkhmat na ki tnat jong ka Archeology bad State Registrar, ïa ka hukum halor kane la pynmih da u Secretary (home) u Girish G Sawant, la ong u Sawant.
U Myntri ka tnat ki kam jngohkai pyrthei u Rohan Khaunte, u MLA na Porvorim, u la dawa ruh ban phah pynlong ïa ka jingtohkit ha kaba ïadei bad ka jingdon jong ka jinglong trai da ka lynti kaba beaiñ ha kaba ïadei bad ki jaka puta bad ong ba ha kaba ïadei bad kane, un sa ïakren bad u Myntri Rangbah.
