Ludhiana, Jymmang:
Ki pulit jong ka Ludhiana ki la pynshisha ba ka jingpyntreikam jong ki ka bym shym la shongthait, ka la khanglad ïa ki koidi ba kin pyndonkam ïa ki Mobile hapoh ki patok kumba ju long ha ki por ba la leit. Ka jingpyntreikam jong ki heh pulit ha kaba ïadei bad ka jingleit jurip bniah ïa ki patok na ka por sha ka por kiba don ha kylleng ki jaka jong ka jylla ka la ïarap ban khanglad halor kane ka jingpyndonkam Mobile ki koidi.
Kane ka jingpyntreikam ka dang ïai bteng ha kaba kumba ka long mynta la ong ba kane ka jingpyntreikam ka la ïarap shibun ban khanglad ïa ka jingpyndonkam mobile jong ki koidi kaba long kawei na ki jingma kaba pynjur ïa ki kam pyntriem hapoh ka jylla bad ka jingwad lad jong ki snar ban phet na patok. Hadien ba la ïoh ban kurup ïa kiba bun ki Mobile phone na ki koidi, ki heh pulit jong ka Punjab ki la ïaleh ban pyntreikam ha ka ban lah ban khanglad ïa ki koidi ba kin pyndonkam ïa ki Mobile bad la ong ba lada lah ban leh ïa kane, ka Punjab kan long ka jylla kaba nyng-kong ha ka ri ka ban lah ban poi ha kane ka sienjam.
Kumba la jia ha kine ki bnai ba la lah, ka la don ka jingleit jngoh ha ka por bym poi pyrkhat ïa ka Ludhiana Central Jail, ha kaba ïadei bad ka jingjurip bniah ïa ki rukom pyntreikam hapoh ki patok. Wat lada ki la don ki jingbuh bad pyntreikam ïa ki CCTV Camera la ong ba ka long kaba eh ban khanglad ïa ki koidi ba kin ïoh ïa ki Mobile, naba ki nongïarap jong ki ki ju kawang ïa ki Mobile Phone hapoh ki patok lyngba ki kynroh kiba jrong. Mynta ïa kum kine ki briew yn sa lah ban wad ban lap da kaba suk ha kaba yn sa khmih bniah ruh lyngba ki SIM Card jong ki trai bad ban pynshitom da kaba tyngeh pyrshah ïa ki ruh. Tang ha ki khyndiat bnai ba la lah, la ïoh ban kurup palat 1,000 tylli ki Mobile Phone na ki patok. Ki heh ba dei khmih, ki la phah pynkhlaiñ ïa ka jingpahara ha ki patok ba bun kiba don hapoh ka jylla.
