Bengaluru, Jymmang:
Kumba la paw, la ong ba ka jingpyntreikam hapoh ka seng BJP kum shi bynta ban pynkhreh ïa ka ilekshon Assembly ka la nang khlaiñ ha kaba ka seng ka la don ka jingkyrmen ban ïoh rah ïa ka jingjop ha ka jingïakhun.
U nongïalam ba ratbah jong ka seng BJP ha Karnataka u B S Yediyurappa u la ong ba un sa leit ban jngoh ïa ki bynta ba bun jong ka jylla na ka bynta ban nang pynkhlaiñ shuh shuh ïa ki jingpyntreikam jong ka seng hashwa ban sdang ka ilekshon Assembly.
U Yediyurappa u la dep ban ïakynduh ïa u Myntri Rangbahduh u Narendra Modi, u Myntri ka tnat ki kam pohïing jong ka sorkar kmie u Amit Shah bad u President jong ka seng BJP u J P Nadda bad ha katei ka jingïakynduh jong ki, ki la ïakren bad ïamir jingmut ha kaba ïadei bad ki jinglong jingman ha ki kam saiñ pyrthei ha ka jylla bad ki jingpynkhreh na ka bynta ban ïakhun ïa ka ilekshon Assembly 2023.
Ha ka jingïakren bad ki nongthoh khubor, u Yediyurappa u la ong ba ka jingshah kynthup jong u hapoh ka BJP Parliamentary Board, kaba long ka kynhun kaba hakhlieduh ban ai ïa ka rai halor ki jingpyntreikam jong ka seng, u la phah ïa ka khubor kaba bha kaba ong bay m tang ha Karnataka un leit ban jngoh hynrei ha ki bynta ba shaphang Shathie jong ka ri baroh kawei.
Kum shi bynta ban pynpaw ka jingsngew-nguh ïa u Myntri Rangbahduh u Narendra Modi bad ïa ka kynhun nongïalam jong ka seng, u Yediyurappa u la ong ba un sa ïai bteng ha kaba ïadei bad ka jingtrei jong u ïa ki kam ha kaba un sa leit ban jngoh ïa ki jaka ba bun hapoh ka jylla, ban leit ruh sha baroh ki distrik khnang ban lah ban nang pynkhlaiñ shuh shuh ïa ka seng BJP bad ïa ka kynhun nongïalam jong ka seng.
U Myntri Rangbah barim jong ka Karnataka, ha kaba ïadei bad kane u la pynshai da kaba ong ba un ym ïakhun ha ka ilekshon.
Ha ka por jong ka jingleit jngoh jong u ïa kiba bun ki jaka hapoh ka jylla ha ki lai bynta, u Yediyurappa u la ong, ba un sa khmih bniah ha kaba ïadei bad ki jinglong jingman haman ki jaka, ban ïakren bad ïaphylliew jingmut bad ki nongbud jong ka seng bad ban ithuh ïa ki nongïalam ki ban sa wan.
