![Yn pynkylla ka Kenya ïa ka khlaw sha ka jaka pynsah kynmaw Kenya](https://unongsainhima.com/wp-content/uploads/2023/06/Kenya-720x451.webp)
Nairobi, Jylliew:
U Myntri ka tnat khlaw jong ka Kenya ha ka Sngi Balang u la pyntip ba ka Kenya kan pynkylla noh ia kawei ka khlaw sha ka jaka pynsah kynmaw.
Katei ka khlaw ba la ju tip kyrteng ka khlaw Shakahola, ka don kumba 325 hectare lane kumba 800 acre ka jingheh, ka don kumba 300 tylli ki lum jingtep bad katei ka khlaw ka dei kaba don markhap bad ka shnong Malindi jong ka Indian Ocean, ha kaba katei ka jinglap jong ki bor pyniaid ka Kenya ia kitei ki lum jingtep, ka la pynkyndit bad pyn lyngngoh ia ki naba kim pat ju shem ia kane la katta ki phew spah snem ba la leit.
U nongialam ka Cult, u Paul Nthenge Mackenzie, u la shah pynngat ha ki kyndon pynkheiñ aiñ bapher hadien ba la shem ia ka jingïalap niam ba bakla jong u, da kaba ialam bakla ruh ia ki paidbah ba bun ha kaba u la pynngeit ia ki ba ka jingshah thngan ka long ka lynti ban ioh leit bneng.
Namarkata, u Myntri ka tnat kam poh iing jong ka Kenya u Kithure Kindiki ha ka Sngi Ba-ar, u la ong ba katei ka khlaw kan ym long shuh kumba ju long bad yn buh noh ia ka naka bynta ban pynsah kynmaw haba iadei bad katei ka bynta. Khang ba ka pyrthei ruh baroh kawei kan tip bad kan kynmaw ia kaei kaba la jia ha katei ka khlaw.
La ong ba ki kynhun wad bniah ki la lap biang sa 9 tylli ki metïap ha katei ka sngi bad kaba la kyntiew ia ka jingdon ki metïap ba la lap na katei ka khlaw sha ka 251 tylli baroh.
Hadien ba la rah ia ki metïap jong kitei kiba iap ha katei ka khlaw, la shem ruh ba katto katne na kitei kiba iap, kynthup ia ki khyllung- khynnah, ki iap na ka jingshah pynshitom bad jingshah tied- shah shoh namar ka jingbym lah jongki ban bud ia kitei ki jinghikai.
U Mackenzie, u long tang u nongñiah kali kamai, hynrei hadien u la kylla long sha u nongïalap niam. Hynrei hadien ba la shem ia katei ka jingialam bakla jong u, la kem noh ia u bad haduh mynta u dang hap hapoh ka jingbishar bad dang set ia u ha patok.
Utei u rangbah u ba la don 50 snem ka rta, u long u nongseng jong katei ka niam kaba la tip kum ka ‘Good News International Church’ bad u la shah kem noh ha ka 14 tarik u Iaiong, hadien ba ki pulit ki la ioh jingtip ba u leit ban rung sha ka khlaw Shakahola ha katei ka por.
Ki pulit ki la ioh kem ruh ia 35 ngut ki briew kiba iadon kti lang bad u halor katei ka kam shakri Blei kaba la ialam bakla ia ki paidbah bad kaba la pynlong ia ki briew ba kin shu duh ei ia la ka jingim da ka shah thngan.
Ki pulit ki la ioh ban pyllait im noh ia 95 ngut ki briew na katei ka khlaw bad kumba 613 ngut pat ki dang jah rngai tad haduh kane ka kynti.