New Delhi, Naitung:
Ka jingïakhih ka la lum ïa ka jingkhlaiñ lyngba ka step katba ki samla pule, ki nongïakhih bad ki nongkyrshan ki la tuid sha surok, da kaba pynmih ïa ki jingpyrta ban dawa jingkitkhlieh halor ka jingkynnoh ba la tuid ïa ki kot eksamin NEET bad ki jingpynkylla kiba kham heh ha ka rukom hikai. Ki paidbah kiba bun, ki la ïaid lyngba ka nongbah pdeng jong ka nongbah Delhi, ha kaba ki la poi sha ki jaka ba kynthup ïa ka Connaught Place, Janpath, Rail Bhawan bad Shastri Bhawan, kaba la pynsangeh ïa ka leit ka wan bad pynlong ïa ki bor synshar ban pynkhlaiñ bha ïa ka jingpahara ha kylleng sawdong jong ka Parliament.
Katba ki nongïakhih ki dang pyrshang ban pynkhih lyngba ki katto katne ki jingkhang nar, ki pulit jong ka Delhi ki la rung shapoh ban khanglad ïa ka jingïaid paidbah ban ïaid shajan jong ka Parliament. La siat da ki lyer pynsat khmat hajan Shastri Bhawan hadien ba ki bynta jong ki paidbah ki la pyrshang ban pynpra ïa ki jingker, katba ki pulit ki la pynlong ruh ïa ka jingbom lathi ban pynsapra ïa ki nongïakhih. Ki jingïakynad kiba rit ki la mih ha ki katto katne ki jaka, ha kaba katto katne ngut ki nongïakhih bad ki bor pahara ki la mynsaw malu mala.
Ki la don shuh shuh ki bor pahara kiba la leit sha ka jaka ba la mih ka jingïakhih bad ki kali ban tem ïa ka jingïakhih jong ka kynhun pyrshah naba ki paidbah ki la nang ïabun bad shlei ha kane ka jaka. La khang khyrdep ïa ka South Gate jong ka Parliament complex, kum ka jingïada, katba katto katne ki surok ha pdeng Delhi, la khang khyrdep. Ki bor pynïaid ki la khang ruh ïa ki khyrdop rung bad mih ha ki san tylli ki station Delhi Metro kiba don hajan ka lynti jong ka jingïakhih, kaba la wanrah jingeh ïa ki nongleit nongwan. La ïohi ba ki nongïakhih ki la pyrta shla shabar bad hapoh ki jaka jong ka steshon metro. Ki la don ruh ki khubor ba lah ban don ka jingpynthut ïa ki signal mobile ha kylleng ki jaka jong ka jingïakhih, watla ki heh sorkar kim pat pynthikna la la pyndonkam ne em ïa ki nongpynthut ïa ki signal.
Ka jingpynbeit ïa ka jingpahara ka dang long kaba pyrkhing bha khamtam eh namar ba ka jingïalang jong ka dorbar Lyiur jong ka Parliament ka la sdang ha ka lah sngi U Blei. Katkum ka jingbthah jong ki pulit ka Delhi, la khang pyrshah ïa ki jingïaid proseshon, ki jingïaid paidbah ban ïakhih bad ki jingïalang jong ki san ngut ne palat shabar jong ki jaka ba la buh kyrpang ban ïakhih khlem da ïoh jingbit shwa. Ki pulit ki la pynskhem kham mynshwa ba ym shym la ai jingbit ïa ka jingïaid paidbah jong u CJP sha Parliament.
Hapdeng ki jingïakhih kiba dang ïaid shabar jong ka Parliament, la ïathuh ba u Myntri ka tnad pule puthi jong ka sorkar pdeng, u Dharmendra Pradhan, u dang ïakynduh ïa u Myntri ka tnat ki kam poh ïing jong ka sorkar pdeng, u Amit Shah, hapoh ka ïingdorbar jong ka Parliament.
Katba ym shym la pynpaw mardor ïa ka agenda jong ka jingïalang, hynrei ka la wan ha ka por ba ki jingïakhih ha ka ri baroh kawei halor ka jingpynkylla ïa ki eksamin bad ka mat NEET ka la nang jur, kaba la buh ïa ka tnad pule puthi hapoh ka jingpeit bniah thymmai jong ka saiñ pyrthei.
Wat haba ki pulit ki dang pyrshang ban teh lakam ïa ki paidbah, ki nongïalam jong ka CJP ki la pynpaw ba ka sorkar ka la plie ïa ka lad ban ïakren. Ki nongmihkhmat jong ka seng, u Saurav Das bad u Ashutosh Ranka, ki la mih na Jantar Mantar ban leit ïakynduh ïa u Myntri ka tnat ka koit ka khiah ka sorkar pdeng, u JP Nadda, hadien ba katkum ka jingong jong ka seng, ka sorkar, ka la kner ïa la ki kti ban ïakren kham mynshwa ha kane ka sngi.
Haba ïasam ïa kane ka jingjia halor ka rynsan X, u Saurav Das u la thoh ba ma u bad u Ashutosh Ranka ki don ha lynti ban ïakynduh ïa u JP Nadda na ka bynta ka seng. U la ong ba ka jingleit shabar jong ka sorkar ka la wan ha ka por mynstep bad u la pynpaw biang ba ki jingdawa jong ka seng ban pynkylla ïa ki eksamin ki dang sah kumjuh. Kham mynshwa, u Das u la ong ruh ba watla ka bor synshar ka la sdang ban ïakynduh, hynrei kam pat don ka jingshai na ka liang ka sorkar, da kaba bynrap ba “ka bol ka don ha ka madan jong ki.”
Ha kajuh ka por, u nongseng jong ka CJP, u Abhijeet Dipke, u la pynkut noh ïa ka jingshah thngan khlem pud jong u, hadien ba u nongïakhih, u Sonam Wangchuk, u la kyrpad ïa u ban leh ïa kane. U Dipke, u la sdang ïa ka jingshah thngan jong u, hadien ba u Wangchuk, u la shah sumar ha Safdarjung Hospital, ha ka 18 tarik, Naitung, hadien ka jingsniew jong ka koit ka khiah jong u, ha ka jingïakhih da kaba shah thngan kaba 21 sngi, ha kaba u la dawa ban iehnoh kam ïa u Dharmendra Pradhan, Myntri ka tnat pule puthi jong ka sorkar pdeng.
Wat la u shah sumar ha hospital, u Wangchuk u dang bteng ban long ka dak kaba khlaiñ bor jong ka jingïakhih.
Ha ka jingthoh ba la sam ha ka rynsan X jong ka Account jong u ha ka lah sngi U Blei, u la ong ba ka jingkoit jingkhiah jong u, ka la kham bha bad kyrpad ïa ki bor pynïaid hospital, ba kin pyllait noh ïa u, wat tang shipor, khnang ba un ïoh ban ïadon bynta lang ha ka jingïaid paidbah ka’Sansad Chalo’ sha Parliament. U la ong ba ka koit ka khiah jong u ka long kaba thikna bad u la pynpaw ïa ka jingkwah jong u ban ïeng ryngkat bad ki nongïakhih.
