Zaporizhzhia, Naitung:
U heh ka tnat nuclear jong ka Russia, u Rosatom, ha ka Sngi ki khyndiat sngi ba la leit, u la pynbna ba u heh ba dei khmih ïa ka shlem nuclear ha Zaporizhzhia, u la khlad noh ha ka jingleit thombor jong ki drone ka Ukraine ha katei ka sngi.
U Alexei Likhachev, ha ka kyrwoh, u iathuh ba ka drone jong ka Ukraine, ka la ther ïa kawei ka kali pahara, kaba don hapdeng ka jaka ba don katei ka karkhana bad ka nongbah Enerhodar, ha kaba u engineer, u Alexander Yakovlev bad u nongñiah jong katei ka kali, ki la duh noh syndon ïa ka jingim ha katei ka jingjia.
Ki shipai jong ka Russia, ki la kurup ïa katei ka shlem nuclear kaba don sha ka phang Shatei Lam Mihngi jong ka Ukraine, kaba heh tam ha ka dew-bah Europe kaba don 6 tylli ki reactor, ha ki taiew ba nyngkong jong ka jinghiar thma jong ka Russia ïa ka Ukraine ha u snem 2022.
Naduh kata ka por kawei pa kawei ka liang ka la ju kynnoh ïa kawei pat da ki kam shipai kiba buh jingma ïa ka jingshngaiñ jong ki shlem nuclear.
Ka nongbah Ener-hodar, ha kaba bun na ki nongtrei katei ka nuclear station, ki shong ki sah, ka dei kaba la ju shah thombor bunsien.
U Likhachev u la ong ba ka jingbym lah jong ki ri Sepngi ban leh eiei halor ki jingshah thombor ha katei ka karkhana “ka pynshlur ïa ka jingpynjur ïa ki kam lehnoh da ka sorkar Ukraine,” bad bynrap ba ki jingshah thombor ha katei ka jaka ki la pyniap ïa 13 ngut ki briew bad pynmynsaw ïa 48 ngut ha kine ki 2 bnai shiteng ba la dep.
U Rafael Grossi, uba dei u khliehduh jong ka International Atomic Energy Agency, kaba dei ka kynhun peitngor jong ka U.N., ula pynrem ïa kane ka jingjia, katba um shym la kdew kyrpang ïa ka Ukraine lane ka Russia.
U Grossi u la ong ba ka “ieng na ka bynta ka jingshah thombor kaba ym lah ban pdiang ïa ka karkhana bad ka jingpyniaid jong ka, kaba buh jingma jur ïa ka jingshngain jong ki nuclear.”
Ka nongaiktien jong ka tnat bar ri jong ka Russia, ka Maria Zakharova, haba thoh ha ka Telegram, ka la ong: “Kane ka dei ka kam runar jong ka sorkar Kyiv kaba u Grossi u dei ban ïohi khatduh – ngi dawa ïa ka jingpynbna kaba shai kaba pynrem ïa kane ka jingpynïap na ki kynhun ba dei peit jong ka pyrthei, nyngkong eh ka IAEA.”
Ka Kremlin ha ka sngi palei ba la dep ka la kynnoh ïa ka Ukraine ba ka la pynjur ïa kaei kaba ka la khot ki kam pyntieng pyrshah ïa katei ka jaka pynmih bor ding. U nongaiktien u Dmitry Peskov u la kynnoh ïa ka Ukraine ba ka la pynlong ïa ki jingïakhih pyrshah ïa ki jingtei jong ki riew paidbah bad pyrshah ïa ki jingtei kiba ïadei beit beit bad kane ka karkhana.
Ym shym la don kano kano ka jingkren mardor halor katei ka jingjia kaba khatduh na Ukraine.
