Tasmania, Naitung:
Katkum ki khubor, la iathuh ba utei u rangbah 31 snem u la lait im na ka jingshah thombor ha u dohkha ‘shark’ katba u dang jngi kai ha ki rud duriaw jong ka Tasmania jong ka ri Australia.
Katkum ki kaiphod ba la ioh lum da ka ABC News, la ong ba kane ka jingjia ka la jia ha ka por kumba 9 baje jong ka step Sngi Saitjaiñ, ka 18 tarik u Naitung, hajan ka Adventure Bay jong ka thaiñ Southeast ka Tasmania.
Ha kaba utei u nongjngi, u don kumba 165 phut ka jing jngai na ryngkew bad u la ngam kumba 26 phut shapoh katei ka um duriaw bad la ong ba dei ha katei ka por kaba u la ngam kham sha trai jong katei ka um duriaw, ba u la shah dait ha utei u dohkha bam briew na ki bynta jong ka kti jong u bad utei u briew u la iathuh ba utei u dohkha ruh u dei uba la don kumba 6.5 phut ka jing jrong.
Ka tnat pulit Tasmania, ka la iathuh ba utei u briew u ialeit jngi ryngkat bad ki 2 ngut ki paralok jong u ha katei ka por ba u shah thombor ha utei u dohkha heh.
Bad la ong ruh ba dei kitei ki para ba ia leit jngi lang bad u, kiba la ioh tan bad pyllait im ia u na katei ka um hadien ba u la mynsaw na ka jingshah dait ha utei u dohkha. Hadien kata, la pynkit noh ia u da ka liengsuiñ sha ka jaka sumar Royal Hobart Hospital. Ki pulit ki iathuh ruh ba utei u briew u la mynsaw bun hynrei kitei ki jingmynsaw kim dei kiba ap jingma ia ka jingim jong u bad ki long kiba suk ban pynkhiah.
Ki bor pyniaid katei ka nongbah, ki ngeit ba kane ka long tang ka jingjia ryngkhat bad kaba utei u briew u la leit poi tam pud hi sha ki bynta ba kitei ki jait dohkha ki ju im bad shong.
Hadien katei ka jingjia, la ong ba ym shym la iohi syrngiew shuh ia utei u dohkha ha katei kajuh ka jaka bad ki pulit ki la kyntu ia ki nongleit jngi kai ba ki dei ban kiar na katei ka jaka bad na ki thaiñ ba marjan bad ka, khnang ban lait na kum kitei ki jingjia ba sniewbok.
