Washington, Naitung:
U Vice President jong ka US, u JD Vance bad ka Second Lady jong u – ka Usha Vance, ki la pynbna ïa ka jingkha ïa u khun ba saw jong ki, kaba pynlong ïa u, u Symbud President ba nyngkong jong ka US, uba shong ha ka shuki ha ki 150 snem tam, ban ioh khun hapdeng ka jingdon jong u hapoh jong ka kam.
Kitei ki arngut ki la ai kyrteng ïa u khun jong ki, da u Alec Neel Vance. La kha ïa u ha ka step Sngi U Blei ha Walter Reed National Military Medical Centre ha Bethesda, Maryland.
“Ngi sngewkmen ban pynbna ba ïa u khunlung shynrang jong ngi, u Alec Neel Vance, la kha mynta ka step. Ka Usha bad u khunlung ki kmen bad koit ki khiah, bad ki khun jong ngi ki sngewkmen haduh katta- katta ban ïakynduh ïa u para barit jong ki,” ong kine ki arngut ha ka jingpynbna ba la pyllait paidbah lang.
Ia katei ka jingpynbna, kaba don ïa ka muhor jong u Vice President ka US, la soi da baroh arngut, u JD bad Usha Vance.
Kine ki arngut ki la ai khublei ruh ïa ki kynhun sumar kiba la sumar ïa ka Usha bad ïa u khunlung ba dang kha thymmai.
“Ki doktor shipai kiba phylla bad ki nongtrei jong ka Walter Reed Medical Centre bad ka White House Medical Unit ki la long ka jingkyrkhu.Ngi sngewnguh shibun eh ïa kiei kiei baroh kiba ki la leh na ka bynta ka ïing ka sem jong ngi,” ki la ong.
U Alec u dei u khun ba saw jong kine ki arngut bad u khun ba lai jong ki. Ki Vances ki la don lypa arngut ki khun shynrang, u Ewan, 9 snem bad u Vivek, 6 snem bad kawei ka khun kynthei, ka Mirabel, 4. Ki la pynjngai shibun ïa ki khun jong ki na ka jingpeit jong ki paidbah.
U khun ba mynshwa jong ki, u dei uba la kha ha u Nohprah 2021, ha ka por ba u bah JD Vance, u dang ialap elekshon ban ioh ïa ka shuki ha US Senate, na Ohio. Kine ki arngut ki la pynbna ha u bnai Jymmang ba ki khmih lynti sa uwei pat u khun shynrang.
Ka jingkha ka la long ruh ka jingjia kaba rit ha ka histori jong ka sain hima sima jong ka ri America. U vice-president ba khatduh uba la tip ba u don khun ha ka por ba u dang shakri ha ka kam u dei u Schuyler Colfax. U khun jong u, u Schuyler Colfax III, u la kha ha ka snem 1870.
Ha khmat ka Colfax, u Vice-President John C. Calhoun u la pdiang sngewbha ïa u khun shynrang, u William, ha ka snem 1829.
U JD Vance, 41 snem ka rta, u la long u briew uba lai uba dang rit tam ban shah pynsmai kum u nongsynshar jong ka US. Utei u nongialam jong ka seng Republican, u la paw kum uwei na ki riew pawnam ha ka jingsynshar jong U President Donald Trump.
Ka Usha Vance, ka la kren paidbah kham mynshwa, hato kitei ki arngut ki lah ne em ban pyniar ïa ka iing ka sem jong ki. Haba kylli shaphang ka jinglah ban jia ha ka por ba ïakren bad u snem ba la dep, ka la ong: “Wat ju ong ba ym ju.”
La kha ïa ka Usha Bala Chilukuri, ïa kane ka longkmie kaba ar, ka dei ka khun jong ki nongwan buhai shnong na India bad la pynsan pynrangbah ïa ka ha California. Ka longïing jong ka ka wad ïa ki tynrai jong ka sha Andhra Pradesh, kaba ai jingsawa kyrpang ïa ka jingwan jong u Alec Neel Vance hapdeng ki nong India America.
Ka Usha bad u JD Vance ki la iakynduh ha ka por ba ki dang pule ha Yale Law School bad ki la ïa poi kha ha u snem 2014.
