Imphal, Jylliew:
Ki nongïalam jong ka Indigenous Tribal Leaders Forum (ITLF) ha ka jingpyllait kyrwoh ha ki khyndiat sngi kiba la leit noh ka la pynbna ba kan nym leit ban ïashim bynta ha ka kimiti wanrah jingsuk (peace committee) kaba la thaw da ka Sorkar Pdeng na ka bynta ban wanrah biang ïa ka shong suk shong saiñ ha ka jylla Manipur.
Ha ka jingpyllait kyrwoh jong ka ITLF (ha ryngkat ka jingïoh ïa ka jingkyrshan na ki paid Kuki jong ka jylla Manipur), ka la pynpaw ruh ïa ka jingpynrem kaba jur halor ka jingshah pynkynthup jong u Myntri Rangbah ka jylla ) N Biren Singh ha katei ka komiti.
Na ka liang ka ITLF ka la jer kyrteng ruh ba u Myntri Rangbah ka jylla Manipur u dei u nongpynshit ha ki jingïakajia bad jingïaumsnam kiba la jia ha ka jylla Manipur naduh ka 3 tarik jong u bnai ba la dep. Kum ban shu ïathuh hangne, na ka liang ki seng trai muluk jong ka jylla Manipur ki la kynnoh ba u Myntri Rangbah ka jylla, ka tnat pulit jong ka jylla bad ki kynhun treikam na ka jaitbynriew Meitei ki la don bynta ban theh umkhluit ha ki jingïakajia bad jingïaumsnam kiba la jia ha ka jylla Manipur.
Na ka liang ka seng ka la pyntip ruh ba u Myntri Rangbah ka jylla u la don bynta ban kren pyrshah ïa ki paid Kuki-Zo la bun bun sien bad kheiñ beiñ ruh ba ki paid Kuki-Zo ki dei ki nongkhaïi droks, ki dkhot seng kieng atiar bad kumjuh ruh ki nongshong shnong poiwir.
Na ka liang ka seng ka la pyntip ba ka shong suk shong saiñ ha ka jylla Manipur kan nym lah ban wanphai katba ki bor pulit jong ka jylla lem bad ki kynhun kieng atiar Meitei ki dang ïoh ïa ka lad kaba kylluid ban leit thombor pyrshah ïa ki shnong ba la shong la sah da ki paid Kukiu-Zo.
Kum ban shu ïathuh hangne, ïa ka komiti wanrah jingsuk kaba don ïa 51 ngut ki dkhot la thaw da ka Sorkar Pdeng hapoh ka jingïalam jong u Lat ka jylla Manipur – Anusuiya Uikey.
Ha katei ka komiti, ki dkhot ki kynthup ruh ïa katto katne ki Myntri ka sorkar jylla, ki MP, MLA, ki nongïalam jong ki seng saiñ pyrthei bad kumjuh ruh ki nongïalam jong ki seng imlang sahlang.
