Ha kane ka pyrthei mynta, ngi ïohi ba ka long kaba donkam shibun ban pynjanai ïa ka sap kaba ngi don la ka dei ha kano kano ka bynta. Ka pyrthei ka donkam bun ki nongshna kali, shna ïing, nong ñiad rong, nongñiah kali, nongpynbeit ïing pynbeit sem, nongshet, nongpynbiang umbam, nongpynbhabriew ïa ki snieh doh, nongkhap shñiuh bad kumta ter-ter. Ha kajuh ka por, ngi donkam ruh ïa ki karikor, doktor, ophisar, ’riew saiñpyrthei, muktiar, nongbishar, nonghikai bad kiwei. Tangba ym baroh kiba lah ban kot ha ka jingstad bad jingshemphang ban poi sha ki kyrdan kiba ngi kheiñ ba ki dei kiba khraw ne kiba heh. Lada ïa baroh la thaw ban long heh long haiñ, mano shuh pat ki ban trei ïa kiwei ki jait kam? Ka aiñ bad ka rukom ka long ba u heh u haiñ u donkam ïa u rit u ria, bad u rit u ria u donkam ïa u heh u haiñ. Ka jingshaniah iwei ïa iwei pat ka donkam namar ym don ruh uwei u briew uba nang lut bad tip lut ïa kiei-kiei baroh.
Ki samla ki ïabeh mynta ban leit pynjanai ïa ki sap ki phong kiba ki don. Ki samla kiba sngewthuh ba kim da lah than ban pule kot, ki jied noh da kiwei pat ban shah pyntbit la ka dei ha ka kam shna jingshna ne ka kam shet kam tiew bad kumta ter-ter. Kaei kaba donkam ka long ka jingshlur bad ka jingbym lehraiñ ban trei ïa ka kam. Dang lah kaba trei dukhi ha kano kano ka kam, la ka dei kaba rit ne khraw, ban ïa kaba shu ap ja na kiwei. U Nongbuh U Nongthaw U la ai ha u khun bynriew ïa ka met ka phad, ka pyrkhat ka pyrdaiñ bad ka sap ka phong bad ngi dei ban pyndonkam hok katkum ka jinglah bor ka jong ngi. Teng-teng ngi kwah rhah ïa kaba ngim lah ban kot bor ruh bad ngi ngat pat ha ka jinglanot. Teng-teng pat, namar ngi tieng ngi syier palat, ngi duh noh ïa kaei kaba ngi dei ban ïoh ruh. Ngin hap ban sngewthuh ïalade, ïa ka sap kaba ngi don, bad ïa ka lawei kaba kumno ngi kwah.
Tangba ngim dei ban shlan ban leh ïa ki kam bymman kum ka jingkhaïi drok. Kane ka ïasyriem bad ka kam pynïap briew. Tang na uwei u nongkhaïi drok, da ki hajar ngut ki briew ki lah ban shah ktah. Ngi sngewthuh ba u drok u long uba remdor bad namarkata, u lah ban khring ïa kiba kwah ban kamai spah kloi khlem da donkam ban trei shitom than. Hynrei don ka ma haba la than eh ka suk! Ban shu ïa ka kwah riewspah kloi da kaba pynïap ïa kiwei kan ym wanrah jingsuk ne jingbha lano-lano ruh. Hap ban ïatrei da ki kam kiba ym don jingktah ïa kiwei, hynrei kiba lah pat ban tei ïalade bad ïa kiwei ruh kumjuh. Long kiba trei dukhi ha kano-kano ka kam kaba phi kwah ban trei bad ka jingminot ka don la ka jong ka bainong kaba khraw bad kaba ym lah ban ïapeiñ bad-no-bad-no.
Ki samla jong ngi khamtam ki dei ban long kiba shlur namar lada ki lah ban pynjanai ïalade ha ka sap ka phong kaba ki don, ki lah ban ïoh kam ïoh jam sha ki bynta bapher bapher jong ka pyrthei ha kaba ka jingïoh kamai ka kham heh. Ka kam ka byllai lada ngi nang ban wad, bad lada ngi minot bad trei shitom, ka kamai kan wan. Ka kam kaba wanrah ïa ka kamai kaba shongkun ka dei hi ka kam kaba yn hap ban pynmih syep pynmih syar. Kiba bun na ki heh saipan ha ka pyrthei ki dei kiba la ïaid lyngba ki rai-eh rai-dam, hynrei kiba la shlur pat ban ïakhun katkum ki sap kiba ki don. Wat ym lehraiñ ïa kano kano ka kam kaba phi trei namar ka dei ka umsyep jong phi. Lada lehraiñ, ngi lah ban ïa duh ja syndon lane ngin hap ban shu ïa ap thap na kiwei. Long kiba shlur, long kiba trei shitom bad khlem pep phin ïoh ïa ka bainong.
