Sa kawei pat ka jingjia shah pynïap ka la paw pyrthei bad pynpaw ñiangkhriat ïa ki nongshong shnong hadien ba iwei i heprit ba dang 3 snem shiteng ka rta, i la duh noh ïa la ka jingim ha ka 22 tarik Ïaïong, 2026 ha Umdang ha West Khasi Hills, hadien ba i la shah thombor da ka wait bnoh ha la u jong u Kñi. Watla ïa ka daw tynrai halor ka jingshah pynïap jong ine i heprit kam pat shai, hynrei ka pyni ïa ka jingbym don dor shuh ka jingim briew bad ruh ban pynpaw ba la synshar ka mynsiem ksuid ba wat ïa i heprit ruh ym don jingmap shuh. La shu ïa pynïap khlem jingsalia.
Kane ka kam pynïap wat ïa kiba dang rit kam dei shuh kaba dang thymmai hynrei ka dei kaba la jia bunsien bad ha kylleng ki bynta jong ka Jylla. Ïa ki briew kiba donkti ha kum kine ki jait kam, ka aiñ ka dei ban leh da kaba tyngeh, namar ha ki kam don shuh ka jingïatiplem ne jingsngewthuh ne jingsngew synei ïa la ki jong ki para briew. Kim tieng ïa ka aiñ ka kanun. Balei ban shu shim beit beit ïa ka jingim kaba kordor, haba don kino kino ki jingbym ïasngewthuh ne lada don kiei kiei kiba bakla pyrshah ïa ki, ki dei ban ïakren da ka ktien kaba shai ym ban shim syndon da ka lynti haduh ban da pynïap syndon. Kane ka jinglong jong ki katto katne ka pyntriem shikatdei. Balei hap ban da pynïap haba mano-mano ruh kim don hok satia ban leh kumta? Kumno kim don ka jingsheptieng ïa kaei ka ban jia ïa ki hadien habud? Kumno kim buh shwa ïalade ha ka jaka jong ito iba ki pynïap khnang ba kin ym shlan ban leh ïa ka kam bymman? Balei ki la ïa shlan ban thom ïa ka sang ka ma? Hato ka dei ka jingtlot jong ka aiñ? Hato ka dei namar ka jingïatiplem, burom ka akor, mynsiem pyrkhat ïa kiwei ki la ïap lut?
Kiba pynïap briew ki la duk ha ka mynsiem bad ha ka jingmut jingpyrkhat. Ym sngewdei shuh hi ban khot briew ïa ki namar ki briew ki dang don ka jingïatiplem bad ka pyrkhat ka pyrdaiñ kaba dang lah ban pynïapher hapdeng ka sang ka ma bad ka lynti kaba dei. Na ka por sha ka por, ngi ju ong ba ki bor jong ka aiñ ki dei ban pynsaja da kaba tyngeh ïa kiba leh ïa ki kam bymman kum ki kam pynïap briew khnang ba kan long ka jingsneng na ka bynta kiwei. Hynrei phewse kam ju long kumta. Kat nang don kiba shah pynsaja la ka dei ka jingshah set patok shirta jingim ne da ki bun snem, katta kiwei ki nang leh ïa kijuh ki kam bymman. Haei shuh ka jingsngewthuh? Kum ki briew, ngi ju shah kyntu ba ngin da pyrkhat bunsien hashwa ban leh ïa kano-kano ka kam ne ban kren ïa kano-kano, bad ym ban shu bam ja khluit. Kita ki jingkyntu kynpham ki jah noh tang shi khyllipmat bad yn sa kyndit bynriew biang ynda la dep leh ïa ka kam bymman. Kam don jingmyntoi shuh ban babe kylla namar ka jingbabe kan ym lah ban pynim biang ïa ito iba ki la pynïap dusmon. Pyrkhat shwa ban leh bad ym ban pyrkhat hadien ba la dep leh ïa ka kam.
Ngi dei ruh ban kdew ba ym don satia kano-kano ka daw kaba lah ban pynksan ïa ka kam pynïap briew. Kiba pynksan ïa ka jingpynïap briew ki dei sa tang kito kiba la duh noh ïa ka jingïatiplem, bad namarkata, kim ïapher satia na kiba dkhat ïa ka jingim briew. Ka aiñ blei bad ka aiñ briew ki khang horkit hordang ban shim ïa ka jingim jong ki para briew. Ka imlang-sahlang baroh kawei kam dei ban ailad ïa kiba kum kine ki kam bymman ban kha roi da kaba ïa mih shakhmat ban pynrem lane ban ïarap ïa ki pulit ban kem ïa kiba donkti lane ban ai ka kti kamon ka kti kadiang ïa ki bahaïing hasem jong kito kiba la duh noh ïa ka jingim. Ha kajuh ka por, naduh na ïing haduh ha skul, dei ban hikai sani bad janai ïa ka jingkordor ban ïa burom markylliang bad ym ban ïa dkhat ïa ka jingim jong kiwei. Ha ki shnong ki thaw, dei ban ïalap ïa kiba kum kine khnang ba naduh dang rit, ki briew kin ïoh ïa ka jinghikai kaba bha.
