Ka dewlynnong Lumpongdeng kaba don ha pung Umiam ha Ri-Bhoi District ka dei kawei na ki dewlynnong kaba la khring ïa kiba bun ki briew namar ka long ka jaka kaba itynnad, kaba thiang bad kaba pynthanda jabieng ïa ki nongleit kai ha kane ka jaka. Ngim lah ban len ba ka jingdon jong kane ka dewlynnong ka la rah shisha ïa ka nam jong ka Jylla bad kaba la ïoh jingïaroh ruh na jan baroh ki briew kiba leit ban sakhi la ka long kito kiba leit ban ïuh kjat halor kane ka dewlynnong ne kito kiba peit nalor ki lum, halor ka jinglong jyrngam, jingbun ki dieng bad jingker sawdong tawiar da ka um.
Ha kine ki khyndiat taïew bad haduh kine ki sngi, ka kyrteng jong ka dewlynnong Lumpongdeng ka la paw bha, ha kaba baroh baroh ki la pynmih ïa ka kyrteng jong ka, ym tang halor ka jingitynnad ka jong ka, hynrei ruh ka dei halor ka jingïasoi soskular jong ka Sorkar Jylla bad ka kompeni Taj Hotel na ka bynta ban kyntiew bad pynitynnad shuh shuh ïa kane ka jaka bad ruh ka bynta jong ka Orchid ha Umiam ba la thmu ban tei ïa kata ka Hotel kaba heh. Haba ngi peit bad phai dien, ka dewlynnong Lumpongdeng ka la long kata ka jaka, ha kaba kiba leit ïuh kjat ki lah ban pynthanda ïa la ka jabieng na ki jingbunkam ne ki jingbun kiwei ki jingpyrkhat naba haba la don ha kane ka jaka, la sngew kumba don sha kawei pat ka bynta jong ka pyrthei, ha kaba ïoh sngew tang ïa ka jingpah jong ki sim, ka jingbeh ka lyer pyngngad hir hir, ka jingsawa ka um bad lait lut na kiwei pat ki jingsawa kumba long ha ki surok syngkien, ki shnong ki thaw bad kumta ter ter.
Ka long kaba donkam ban pynneh pynsah ïa ka jingjyrngam jong kane ka jaka, kaba long kawei na ki jingdon nam jong ka Jylla. Hynrei kumba ka paw mynta, ngi ïohi ba ka la don ka jingpynkhyllem ïa kiba bun ki dieng kiba don ha kane ka jaka bad ngim lah ban tip mano kiba la pynkhyllem. Donkam ban tehlakam bad khang pyrshah ïa kane ka jingpynkhyllem dieng. Lada pynkhyllem noh ïa ki dieng, ka jingitynnad jong kane ka jaka kan sa jah noh. Hooid ngi donkam pat ban pynitynnad ïa kane ka jaka, kata da kaba buh ïa ki jaka shongkai, ki jaka rieh slap, ki jaka leit shabar, ki jaka ïaid kjat bad khamtam lei ban pynlong ka jaka kaba khuid ba suba. Hooid kane ka jaka, kumba ka long mynta, ka lait na ki jingshah leh pathar ne shah pynjot pynpra kumba long kiwei pat ki jaka jngohkai pyrthei namar ban poi sha kane ka jaka hap ban shong da ki lieng ym kum sha kiwei pat kiba ngi lah ban leit da kino kino ki rukom ruh.
Ngi ïohi pat hadien ba ka la don ka jingïasoi soskular jong ka Sorkar bad ka kompeni ban aiwai ïa kane ka jaka haduh 60 snem, ka la mih ka jingpyrshah kaba jur khamtam na ka Green Tech Foundation. Hooid ka jingpyrshah ka long kaba don nongrim namar ngim kwah satia ba kan don ka jingpynduh pyndam ïa ka jinglong jyrngam bad pynjot ïa ka mariang. Haba ngi peit, ki nongwan shangkai pyrthei sha Meghalaya barabor ki ju ïaroh beit ïa ka jinglong ka mariang, ka jinglong jong ki lum ki wah, ki kshaid, ka jinglah ban pynneh ïa ka jingjyrngam jong ki jaka. Ki nongjngohkai pyrthei ki sngewthuh ïa ka jinglong kordor jong ka jingdon ki jaka kiba la buh da u nongbuh nongthaw khlem da don ba mushlia namar kane ka dei kata kaba ki kwah ban sakhi. Ngi lap ba sha kiwei ki ri bad ki bynta jong ka pyrthei, kiba bun ki jaka jngohkai pyrthei ki dei kiba la da pynwandur da u briew ym kiba don lypa kumba ki dei ban don. Kumta ka long kaba donkam ban pynneh pynsah ïa ka jinglong jong ki jaka jngohkai hynrei kaba donkam pat ka long ba dei ban don pat ïa ka jingpynneh ïa ka khuid ka suba bad ban tehlakam ïa ka jingleh pathar ne bret pathar.
