Jowai, Nailar 06:
Ka hat-trick ba la khur da u Lakhon Dkhar ka la biang pura ïa ka Nangbah Pohshnong ban khur ïa ka jingjop ha ka lympung ïalehkai 3rd Division Football Tournament (3rd Adelbert Laloo Memorial Trophy) ba la pynïaid da ka West Jaiñtia District Sports Association.
Ha katei ka jingïakhun kaba la long ha ka sngi Saitjaiñ ha Kiang Nangbah Stadium, ka Nangbah Pohshnong ka la pynliem noh ïa ka Loompyrdi Ïongpiah da 3-1 kol. U Lakhon Dkhar u la thep lai kol ha ka minit kaba 34, 40 & 45 na ka bynta ban khur syndon ïa ka hat-trick. Katba ka Loompyrdi ka la ïoh ei shi kol na ka daw ka jingbakla thep hi u rangïalehkai ka Nangbah u Bhaki Hinge ha ka minit kaba 63.
Haba phai sha ka jingïakhun kaba bud, ka SCSC Nonglatem bad ka Mukhla Umlangshor ki la ïasam mar shi point hadien ba ïakhaid mar 2-2 kol.
Na ka SCSC Nonglatem la thep da u Pial Langshiang (12) bad u Rikwis Mynsong (69). Katba ki nongthep kol jong ka Mukhla Umlangshor ki long u Rio Lyngdoh (9) bad u Ni o Sumer (47).
