Agartala, Nailar:
Kum shi bynta ban ai mynsiem ha kaba ïadei bad ka jingthmu ban kyndang noh ïa ka sorkar BJP na ka bor synshar, ha ka 30 tarik, Nailar, u Myntri Rangbah jong ka Tripura u Manik Sarkar u la ong ba katba ym pat don ka jingïakren jong baroh ki seng saiñ pyrthei bad ki riew paidbah ha kaba ïadei bad ka jingïakhun pyrshah ïa ka seng BJP ha u 2024, ka jingtrei shitom na ka bynta ban wanrah ïa ka ïoh ka kot kan sa nang buh jingeh.
U Sarkar u la ong ïa kane ha ka por ba u la ai jingkren ha ka jingïalang paidbah jong ka CITU, ha Agartala ha kaba ïadei bad ki 16 tylli ki mat ba kongsan halor ki jingdawa, kynthup ha kaba ïadei bad ka bainong sngi, ka jingtrei, ka bam, ka jingkhot trei biang ïa ki nongtrei ba la shah mait kyrteng, ka jingai jingkyrshan shuh shuh ka jingsiew bad ban pynkut noh ïa ka jingñion beiñ ïa ki nongtrei.
“Ka sorkar jylla ka la hap ban khmih bniah halor ka jingpyntreikam ïa kine ki 16 tylli ki mat jingdawa bakongsan kumba la kdew. Ha Tripura, ka sorkar kaba mynta, ka la treikam katum ka hukum kaba la wan na ka sorkar kmie. Kumta ki la leh ïa kiei kiei pyrshah ïa ka jingkwah jong ki paidbah naduh basdang. Kane ka sorkar kam don kano kano ka jingtrei shitom na ka bynta ka kynhun jong ki paidbah bad ka la shu pyrkhat tang na ka bynta ka jingïatreilang. Ka sorkar ka la shu pyrkhat tang kumno ban ïohnong na ka jinglum pisa na ki, la ong u Sarkar.”
“U Mandal bad ki nongïalam jong ka Morcha ki la lute lut ïa baroh ka bhah ba la mang ha kiba bun ki tnat treikam. Ki la lute ïa ka pisa kaba la mang na ka bynta ki nongtrei jong ka MNREGA bad TUEP. Ym don mano mano ruh ban trei ne ban kren halor kane ka bynta. Kiba kum kine ki jinglong jingman ki dang ïai bteng ha ka jylla Tripura”, u la bynrap.
