Britain, Nailur:
Ki bor pyniaid ka Britain ha ka Sngi Balang ki la bthah ia baroh ki khyrdop rung bad mih jong ka ri ba kin peit bniah bha bad wad ia uwei u shipai barim uba don kti ha ki kam thombor jong ki lehnoh, hadien ba u la lait phet na patok da kaba snoh na khrum jong ka trok kit jingkit ha katei ka sngi.
Ia utei u briew la ithuh kyrteng u Daniel Abed Khalife bad u la don 21 snem ka rta. U Daniel u ju shah pyntrei hapoh ka jaka shet jong ka patok Wandsworth bad ha katei ka sngi u phong ruh ia ka jaiñ phong kumba ju riam ki nongshet kaba don ia ka sopti rong lieh bad ka patlun thoh saw bad lieh.
Ka Motropolitan Police ka la pyntip ba ka la bthah ia ki jaka rung bad jaka mih naduh ki kad liengsuiñ bad ki jaka sangeh jhad ba kin peit thuh bha ioh ki lap ne iohi ia utei u briew uba long u suba don kti ha ka kam thombor jong ki lehnoh ha ki por ba la leit.
Watla u la ioh phet na katei ka patok, hynrei la shu antad ba un dang don hi pat hapoh London.
Kumta la bthah ruh ia ki paidbah lada ki iohi ia utei u briew ba kin ym leit tur sha u hynrei ba kin shu pyntip beit- beit sha ki pulit ba kin ioh ban kem biang bad ban leh ia kaba donkam baroh.
U Daniel u la shah pynmih hakhmat ka ïingbishar jong ka London ha ka 28 tarik u Kyllalyngkot jong une u snem bad u la shah pynngat kyndon bad shah kem ruh halor kajingdon kti ha ki 2 tylli ki jingjia ha ka Royal Air Force (RAF) ha Stafford bad Central England hajan ka shlem treikam ki shipai kaba u sah.
U Daniel u la shah pharep don kti ha ka jingphah jingtip sha ki briew jong ka kynhun lehoh ha u Nailar jong u snem 2021 bad la suba don kti ruh ia u ha ka jingleit buh bom ha RAF ha ka 2 tarik u Kyllalyngkot jong une u snem 2023.
Kumta, ka Prison Service ka la ialeh katba lah ban iatrei lang bad ki pulit ka ri naka bynta ban ioh kem biang noh ia u Daniel ha ka por kaba kyrkieh khlem da ailad ruh ia u ban ioh ban leit phet sha kiwei pat ki ri.
