Shillong, Nailur 24
Kum shi bynta ban leh pyrshah ïa uwei na ki nongpyntriem ba shong ba sah ha Canada ïa uba la tip kyrteng kum u Gurpatwant Singh Pannu, ka kynhun tohkit National Investigation Agency (NIA) ha ka Sngi Saitjaiñ ka la kurup noh ïa ka ïing sah bad ka jaka jong une u briew kiba don ha Amritsar bad Chandigarh.
U Pannu u kam ba u dei u General Counsel ka kynhun ba la shah kheiñ be-aiñ ba la ai kyrteng Sikhs for Justice (SFJ).
Ha u kyrwoh khubor, ka NIA ka la ong ba katei ka jingkurup ïa ka ïing bad ka jaka jong u Pannu ka long kum shi bynta ban ïakhun pyrshah ïa ki kynhun pyntriem kiba treikam na kiwei pat ki Ri, kynthup ka Canada. Ka jingkurup ka long hadien ba la ïoh hukum na ka ïingbishar NIA.
Shuh shuh ka NIA ka la ong ba u Pannu u la don hapdeng ka jingshah thwet naduh u snem 2019 hadien ba la pynrung ïa ka jingujor banyngkong eh pyrshah ïa u. La ong ba u Pannu u la donkti ha ki kam pyntriem bad ban pynsaphriang ïa ka jingsyier da kaba pynmih ïa ki jingbyrngem byrsit ha Punjab bad kiwei pat ki bynta jong ka Ri.
Ka ïingbishar ka la ai ïa ki ‘Non-Bailable Warrant’ pyrshah ïa u Pannu ha ka 3 tarik Rymphang, 2021 bad la pynbna ba u dei u ‘Proclaimed Offender’ (PO) ha ka 29 tarik Naiwieng, 2022.
Katkum ki jingtohkit ba la leh da ka NIA, la paw ba ka kynhun jong u Pannu – Sikhs for Justice – ka la pyndonkam bakla ïa ki rynsan ‘Social Media’ ban pynshit ïa ki samla bad ban kynshoit ïa ki ban leh ïa ki kam pyntriem. Ka la paw ruh ba u Pannu u dei uba pynïaid ïa ka ‘Sikhs for Justice’ bad ïa kane ka kynhun la kheiñ be-aiñ da ka sorkar India ha ka 10 tarik Naitung, 2019.
Nalorkata, ka NIA ka la ong ba u Pannu, uba la shah kheiñ kum u ‘Designated Individual Terrorist’ da ka sorkar India ha ka 1 tarik Naitung, 2020, u la don bynta ban pynshit ïa ki runar ha Punjab bad ki samla lyngba ki rynsan ‘Social Media’ ban ïakhun na ka bynta ban ïoh ïa ka Ri ba la tip kum ka Khalistan kaba long pyrshah ïa ka Sorkar India.
Ka NIA ka la ong ruh ba ha ki khyndiat sngi, la mih ha ki lad pathai khubor ba u Pannu u la byrngem byrsit ïa ki babu jong ka Sorkar India kiba don shabar ri. Nalorkata, u la byrngem ruh ïa ki Hindu kiba shong ba sah ha Canada da kaba kynnoh ba ki la ai ïa ka jingïatreilang bad ka India.
