Guwahati, Nailur:
U Myntri Rangbah jong ka Assam u Himanta Biswa Sarma u la pyllait paidbah ïa ka skhim “Chief Minister’s Atmanirbhar Asom Abhijan 2023” ban ai jingïarap sha ki samla ba kin lah ban trei ïa ki kam lajong.
Ka jingthmu jong kane ka skhim ka long ban kyrshan na ka bynta ban seng kam lajong bad ban ïeng ha la ki jong ki kjat. Ha ka prokram ba la pynlong, u Sarma u la pyllait paidbah ruh ïa ka Registration Portal.
Hapoh ka jingtreikam jong kane ka skhim, yn sa ai da ka jingïarap pisa sha ki 2 lak ngut ki samla na ka bynta ka jingthmu ba kin ïoh ban seng ïa ki kam lajong khnang ba kin lah ban ïeng hala kijong ki kjat.
Shuh shuh la ong ba kane ka skhim, ka long ban pynkupbor ïa ki samla kiba khlem kam-khlem jam kiba la don ïa ki kyrdan jingnang jingstad, kane kan ïarap ha ka ban lah ban plie ïa ki lad ki lynti na ka bynta jong ki ba kin lah ban nang pyntbit shuh shuh ïa ka kam ba ki thmu ban trei bad ba ki ju trei bad lah ban pynmih kam shuh shuh ïa kiwei pat ki bym donkam- donjam khnang ban lah ban kyntiew ïa ka ïoh ka kot ha ki thaiñ nongkyndong.
U Sarma u la ong ba kane ka skhim ka long ban kyrshan ïa kiba thmu ban seng ïa ki kam lajong halor ka jingthmu ba ki samla kin lah ban nang kyntiew shuh shuh ïa ka ïoh ka kot ha ka jylla.
U la ong ba kane ka skhim khlem artatien kan long ka jingkyrshan bad ka jingkyntiew ïa ka ïoh ka kot ha ka jylla.
Kumba la sakhi, la ong ba kiba bun ki samla kiba khlem kam khlem jam ki dei kiba don ha ka kyrdan pule ba ïadei bad ka kam Engineering, MBBS, BDS, Agriculture, Animal Husbandry, Fishery bad kiwei pat bad ïa kine yn sa buh hakhmat eh bad yn sa ai jingïarap pisa sha ki mar T. 5 lak, la ong u Sarma.
Ha kawei pat ka bynta, ki samla kiba khlem kam-khlem jam kiba don ha ki Post-Graduates, General Graduates, ITI, Polytechnic yn sa buh ha ka bynta kaba ar na ka bynta ka jingïoh jingïarap pisa kaba T. 2 lak.
Ha ka bynta kaba nyngkong, u Sarma u la ong ba na ka T. 5 lak, ki nongïoh myntoi kin hap ban donkam ban pynphai da kumba T. 2.5 lak khlem kheiñ sut bad kaba dang sah yn sa ïarap da ka sorkar.
Kumjuh na ka bynta ka kynhun kaba ar, u Myntri Rangbah ula ong ba T. 1 lak yn sa ai jingïarap da ka sorkar bad kaba sah ka dei ban hap siew ne pynphai pat da ki nongïoh myntoi khlem donkam siew sut.
