New Delhi, Risaw:
Ka Kynhun Myntri jong ka Sri Lanka ka la mynjur ban ïaid shakhmat ha kaba ïadei bad ka rukom pyntreikam na ka bynta pyllait ei ïa bai Visa na ka bynta ki nongjngohkai pyrthei kiba na India bad na 6 tylli kiwei pat ki ri, la ong u Myntri ka tnat korbar ri u Ali Sabry ha ka sngi Ba-ar hapdeng ka por jong ka jingtrei shitom jong kane ka ri kaba la shah ktah ha kaba ïadei bad ki kam jngohkai pyrthei.
U Sabry ha ka jingthoh kaba u la phah, u la ong ba ïa kane ka jingthmu yn sa lah ban pyntreikam bad ban ïaid shakhmat ha kaba yn sa pyntreikam haduh ka 31 tarik, Lber jong u snem 2024. Ka kynhun Cabinet ka la mynjur ban pyllait ei ka bai Visa sha ki nongleit jingleit kiba na India, China, Russia, Malaysia, Japan, Indonesia bad Thailand.
Katkum ka jingkhmih bniah na ki jingbuh jingkheiñ la ong ba ka India ka la paw hakhmat eh ha kaba ïadei bad ka jingdon jong palat 30,000 ngut ki nongjngohkai pyrthei kiba la wan poi ha ka ri ne 26 per cent ha kaba ka China ka la long da palat 8,000 ngut ha kaba ka la wan ha ka kyrdan kaba ar halor ka jingdon bun jong ki nongjngohkai pyrthei.
