Patna, Risaw:
Ka seng JD(U) ka la pynbna ïa ki kyrteng jong ki kyrtong ha ki san tylli ki konstitwensi na ka bynta ka jingïakhun ha ka ilekshon Assembly ha Madhya Pradesh. Kane ka seng ha ryngkat ka jingïatreilang bad ka Congress ka la pyrshang ban knieh noh ïa ka bor synshar na ka BJP.
Katkum ka jingthoh ba la phah da u General Secretary jong ka seng JD(U) ha ka ri u Afaq Ahmed Khan ha ka sngi Ba-ar, la ong ba kane ka dei ka seng kaba la pyllait nyngkong ïa ka thup kyrteng jong ki kyrtong ki ban ïakhun na ka bynta ka ilekshon ha Madhya Pradesh, ha kaba ka jingthep vote na ka bynta ban jied ïa ki 230 ngut ki dkhot jong ka ïingdorbar kan sa long ha ka November tarik, Naiwieng.
Ki san ngut ki kyrtong kiba la shah pynpaw kyrteng ki kynthup ïa u Chandra Pal Yadav (Pichhor), Ram Kunwar Raikwar (Rajnagar), Shiv Narayan Soni (Vijay Raghavgarh), Tol Singh Bhuria (Thandla) bad u Rameshwar Singla (Petalawad).
U Myntri Rangbah jong ka Bihar u Nitish Kumar, uba long u heh nongïalam jong ka seng JD (U), u la iehnoh ïa ka seng BJP ha u snem ba la lah haba u la leit ban pynïasoh noh bad ka kynhun ‘Mahagathbandhan’ kaba la kynthup lang ïa ka seng RJD ba la ïalam da u Lalu Prasad, ka seng Congress bad ka kynhun Left, bad kular ban pynrem ïa ka kynhun NDA ha ka jingïakhun ïa ka ilekshon Lok Sabha 2024 da ka jingïatreilang bad kiwei pat ki seng hapoh ka kynhun jong ka liang pyrshah. Ka jingtrei shitom jong u ka la pynlong ban lah ban thaw ïa ka kynhun synrop jong ki seng ka liang pyrshah ka INDIA.
