Jaipur, Risaw:
Ka kynhun Enforcement Directorate (ED) ka la khot hajir ïa u Vaibhav Gehlot, uba long u khun jong u Myntri Rangbah jong ka Rajasthan u Ashok Gehlot, na ka bynta ban kylli jingkylli ha kaba ïadei bad ka jingpynkheiñ ïa ka kyndon hapoh ka Foreign Exchange Management Act (FEMA) ha ka 30 tarik, Risaw, ha ka por 11:30 mynstep ha ka jaka treikam jong ka kynhun ha Delhi.
U Gehlot u la dei ban leit mih hakhmat jong ka kynhun hynnin ka sngi, hynrei u la buh ka jingkyrpad ban pynjlan halor kane ka jingkhot hajir hadien 15 sngi. Ha kaba Foreign Exchange Management Act (FEMA) adei bad kane ka jingkyrpad jong u, ka kynhun ED ka la ai jingbit ïa u tang hapo saw sngi ha kaba u la hap ban leit mih hakhmat ka kynhun ha ka 30 tarik.
U Vaibhav Gehlot u la shah bthah ba u la dei ban leit mih hakhmat ka jaka treikam jong kane ka kynhun ha Jaipur lane ha New Delhi hynnin ka sngi, la ong ki heh ka kynhun tohkit.
Kane ka jingshah khot hajir ka don bynta bad ka jingpynlong ïa ka jingleit khynra ba dang shen ba la pynlong da ka kynhun ED pyrshah ïa ka Hospitality Group Triton Hotels & Resorts Pvt. Ltd., bad ka Vardha Enterprises Pvt. Ltd., kiba don ha Rajasthan bad pyrshah ïa ki Director bad ki Promoter jong ki kiba kynthup ïa u Shiv Shankar Sharma, Rattan Kant Sharma bad kiwei pat.
Ka kynhun tohkit ka la leit khynra ïa ki kompeni bad ki nongkhmih bad nongpynïaid jong ki na ka bynta laisngi ha u Nailar ha Jaipur, Udaipur, Mumbai bad ha Delhi. Ha kane ka jingkhynra ka kynhun ED haduh mynta ka la ïoh ban kurup ïa ka pisa ka bym don jingkheiñ kaba la kot sha ka T. 1.2 klur. Ka jingshah khot hajir jong u Gehlot ka long halor ka jingdonkti ban pynkheiñ ïa ki kyndon ba ïadei bad ka jingkylliang pisa bar ri ha ka por ba dang pynkhreh ïa ka jingpynlong ïa ka ilekshon Assembly ha Rajasthan, ïa kaba la thmu ban pynlong ha ka 25 tarik, Naiwieng, bad ka jingñiew ïa ki vote la buh ba kan long ha ka 3 tarik, Nohprah.
