Kolkata, Risaw:
U heh nongïalam jong ka seng Trinamool Congress u Jyotipriya Mallick u la shahkem noh ha ka kynhun Enforcement Directorate hadien ka jingshah kylli jingkylli kaba la long palat ïa ki 20 kynta ha ka por ba ka la don ka jingshah khynra ka ïingsah jong u kaba don ha Kolkata, halor ka jingshah kynnoh donkti ha ka kam bamsap.
Ki heh jong ka kynhun Enforcement Directorate (ED) ki la sdang ban pynlong ïa ka jingleit khynra ha bun tylli ki jaka kynthup ha ka ïingsah jong u Myntri jong ka West Bengal u Jyotipriyo Mallick ha kaba ïadei bad ka jingjia kaba dang don hapdeng ka jingshah tohkit halor ka jingdon jong ka jingklop ïa ka tyngka kaba bun kaba la kot sha ki klur tyngka, la ïathuh u heh ka kynhun.
Ha kaba ïadei bad ka jingpyntreikam, ka kynhun ED ka la leit ban khynra ïa ar tylli ki Flat kiba dei jong u Mallick, uba long mynta u Myntri uba dei khmih ïa ka tnat ki kam khlaw ha ka jylla, ha ka thaiñ Salt Lake kaba don ha Kolkata, da ka jingsynran jong ki shipai ka sorkar kmie, la bynrap u heh ka kynhun tohkit.
Ka jingleit khynra ka la long ruh sha ki phra tylli kiwei pat ki Flat kynthup ha ka ïingsah jong u Personal Assistant (PA) barim jong u Mallick ha ka por ba u dang long u Myntri uba dei khmih halor ki jingbam, u la ong.
“U Myntri um shym don hapoh ïing ha ka por ba la pynlong ïa ka jingleit khynra. U la wan kham hadien bad ïa ka Phone jong u ruh la shimti noh da ka kynhun tohkit. Ki la don kumba phra ngut ki heh sorkar hapoh. Ngi la pynlong ruh ïa ka jingleit khynra ha ka jaka sah jong u PA barim kaba don ha Dum Dum bad ha ki katto katne tylli kiwei pat ki jaka,” la bynrap shuh shuh u heh ka kynhun ED ha ka jingïakren bad ki nongthoh khubor.
Kane ka kynhun tohkit jong ka sorkar kmie ka la ïohkem lypa ïa uwei u briew uba la shah kynnoh donkti ha kane ka kam bamsap ha kaba la ong ba u la don ka jingïadei bad ka seng Trinamool Congress bad kumjuh bad u Mallick, la ong u heh ka kynhun tohkit.
Haba la dep ban tohkit ïa u Mallick, hashwa ba un shah ïalam sha ïingbishar hadien ka jingshahkem u la shah ïalam shwa sha ka jaka ai jingsumar na ka bynta ban khmih bniah ïa ka koit ka khiah jong u hynnin ka step.
U Jyotipriya Mallick u la shahkem halor ka jingshah pynshisha ba u la donkti ha ka kam bamsap ha kaba ïadei bad ka jingsam ïa ki jingbam Ration.
Hadien ka jingshahkem jong u ha ka por ba u la shah ïalam sha ka jaka treikam jong ka kynhun Enforcement Directorate kaba don ha Kolkata, u Myntri u la ïai bteng ban pynrem jur ïa u nongïalam jong ka liang pyrshah u Suvendu Adhikari halor ka jingshahkem jong u.
“Nga la long u lanot jong ka jingïasuhbuit sniew ha kaba ïadei bad ki kam saiñ pyrthei. Haduh mynta ka BJP ka dang don ha ka bor, kiba kum kine kiei kiei baroh kin sa ïai jia”, la ong u Mallick ha ka jingïakren bad ki nongthoh khubor.
