Jammu, Risaw:
Uwei u shipai jong ka tnat Border Security Force (BSF) u la mynsaw na ka jingïasiat ha ki bynta jong ka khappud India-Pakistan ha Ranbir Singh Pura kaba don hajan Jammu ha kaba ka la bteng haduh ka por 3 baje mynstep jong ka sngi Thohdieng, la ïathuh ki heh ba dei khmih halor kane ka bynta. Ka jingïasiat ka la long hapdeng ki shipai ka Pakistan bad ki shipai ka tnat BSF ha kaba ka la sdang naduh ka por 8 baje mynmiet jong ka sngi Palei.
Kumba la ïathuh u nongaiktien jong ka tnat BSFha Delhi la ong ba ki shipai Pakistan ki la siat ruh da ki Mortar ha kaba na ka liang jong ki shipai ka ri ki la pynphai kylla. U nongaiktien jong ka tnat shipai u la bynrap shuh shuh da kaba ong ba ka jingïasiat ka la bteng haduh ka por 3 baje mynstep jong ka sngi Thohdieng ha kaba kane ka la pynmynsaw ïa uwei u shipai. “…ïa une u shipai uba la mynsaw la ai jingsumar,” la bynrap u nongaiktien. Ki nongshong shnong kiba don ha ki bynta khappud ki la long kiba husiar bha na ka jingpynkheiñ jong ki shipai ka Pakistan ïa ka aiñ sangeh ïasiat. Kumba la sakhi da ki nongshong shnong, la ong ba ki la don kumba kattto katne tylli ki Mortar ba la siat da ki shipai Pakistan kiba la leit hap ha ki katto katne tylli ki ïing kiba don hajan khappud bad ha kaba ïadei bad kane, na ka liang ki shipai ki la bthah ïa ki briew ba kin pyllip noh ïa ki Light bad ban long kiba husiar bad ban ïada na ka jingshah thombor.
