Amaravati, Risaw:
Ka jingïap jong ki briew na ka jingtakhuh jong ki rel kaba la jia hapdeng ka shnong Kantakapalli bad Alamanda kiba don ha Andhra Pradesh ha ka miet jong ka Sngi U Blei ka la kiew sha ki 14 ngut.
Ka District Collector ka Nagalakshmi ha ka jingïakren bad ki nongthoh khubor ka la ong ba ki la don kumba 14 ngut ki nongleit jingleit kiba la ïap ha ka jingjia bad ïa ki metïap jong ki 11 ngut la lah ban ithuh. Ka la ïathuh ba ki la don kumba 32 ngut kiba la mynsaw ha ka jingjia ha kaba kine ki la shah sumar ha GGH kaba don ha Vizianagaram; uwei napdeng kiba la mynsaw la pynkit sha KG hospital bad uwei pat sha NRI hospital kaba don ha Visakhapatnam. Ka jingshitom jong kiwei pat ki saw ngut kiba la mynsaw ka la kham jur, la ïathuh ka Collector. Ïa ki briew kiba la shah ithuh hadien ka jingïap jong ki na ka jingjia, la tip kyrteng kum u Kanchubaraki Ravi, Gidijala Lakshmi, K Appala Naidu, Challa Sathish, SMS Rao, Pilli Nagaraju, M Srinivas,Tenakala Sugunamma, Reddy Seetham Naidu, bad u Simhachalam. Kumba la ïathuh ka tyllong khubor kaba la wan na ka tnat Railway la ong ba ki la don kumba 11 tylli ki bynta jong ka rel 08532 Visakhapatnam-Palasa ba la rah sha Alamanda Station bad 9 tylli ki bynta jong ka rel 08504 Visakhapatnam-Rayagada la rah sha Kantakapalli Station.
Ki heh jong ka tnat Railway ki la ïathuh shuh shuh ba ki jingpyntreikam bad ki jingïarap ban sei ïa ki briew ka dang bteng haduh ba la thoh ïa ka khubor da ka jingïarap jong ki pulit ka kynhun NDRF bad SDRF.
